Por orde desta consellería do 9 de xaneiro de 2009, publicada no DOG do 21 de xaneiro, dítanse as normas para a aplicación do réxime de concertos educativos cos centros docentes privados a partir do curso académico 2009-2010, de conformidade co establecido na Lei orgánica 8/1985, do 3 de xullo, reguladora do dereito á educación, na Lei orgánica 2/2006, do 3 de maio, de educación, e no Real decreto 2377/1985, do 18 de decembro, polo que se aproba o Regulamento de normas básicas sobre concertos educativos. A duración dos concertos subscritos será ata o curso 2012-2013.

Por Orde do 26 de agosto de 2009, publicada no DOG nº 170, do 31 de agosto, aprobáronse os concertos educativos cos centros docentes privados de educación infantil, educación primaria, educación secundaria obrigatoria, educación especial, programas de cualificación profesional inicial, ciclos formativos de grao medio e de grao superior; modificada pola Orde do 21 de decembro de 2009, publicada no DOG do 30 de decembro.

De conformidade co previsto na Orde do 9 de xaneiro de 2009, en relación co Real decreto 2377/1985, do 18 de decembro, os concertos poderán modificarse a partir do curso 2010-2011 a instancia de parte ou de oficio, seguindo procedemento que a orde determina.

Por isto, por proposta da Dirección Xeral de Centros e Recursos Humanos,

DISPOÑO:

Primeiro.

1. Modificar os concertos educativos aprobados por Orde do 26 de agosto de 2009, subscritos cos centros docentes privados segundo se detalla no anexo I desta orde.

2. Estes concertos terán vixencia ata o curso 2012-2013, incluído.

Segundo.

Aprobar a formación en centros de traballo para os ciclos formativos de grao medio e grao superior de duración dun curso, que se realizará nos meses de setembro a novembro de 2010, segundo se detalla no anexo II.

Terceiro.

1. As modificacións efectuaranse mediante addenda ao documento administrativo de formalización de concerto educativo subscrito polo centro, que se asinará pola persoa titular do centro privado ou persoa con representación debidamente acreditada e polo director xeral de Centros e Recursos Humanos, de conformidade coa Orde do 22 de abril de 2010 de delegación de competencias nos órganos superiores e periféricos da Consellería de Educación e Ordenación Universitaria.

2. Os centros afectados acreditarán ante a Dirección Xeral de Centros e Recursos Humanos, no prazo dun mes desde a publicación desta orde no Diario Oficial de Galicia, que se atopan ao día do pagamento de todas as súas obrigas tributarias e coa Seguridade Social.

3. Se a titularidade do centro non subscribise o documento de formalización na data que se lle notifique, entenderase decaído o seu dereito.

Cuarto.

Esta orde terá efectos económicos e administrativos do 1 de setembro de 2010.

Contra esta orde, que esgota a vía administrativa, os interesados poderán interpoñer recurso potestativo de reposición ante esta consellería, no prazo dun mes, a partir do día seguinte ao da súa publicación no Diario Oficial de Galicia, segundo o disposto nos artigos 116 e 117 da Lei 30/1992, de réxime xurídico das administracións públicas e do procedemento administrativo común ou, directamente, o recurso contencioso-administrativo, no prazo de dous meses contados desde a mesma data, ante a Sala do Contencioso-Administrativo do Tribunal Superior de Xustiza de Galicia, de conformidade coa Lei 29/1998, do 13 de xullo, reguladora da xurisdición contencioso-administrativa.

Santiago de Compostela, 11 de agosto de 2010.

Jesús Vázquez Abad

Conselleiro de Educación e Ordenación Universitaria

Ver referencia pdf "16100D003P005.PDF"