A Consellería do Medio Rural convocou para o ano 2010 axudas para a moratoria dos préstamos vinculados coa mellora de explotacións e incorporación das persoas mozas á actividade agraria mediante a Orde do 22 de xuño (Diario Oficial de Galicia nº 119, do 24 de xuño).

Nesa orde, no seu artigo 5.7º establécese que o prazo de presentación de solicitudes será de dous meses, contado desde o día seguinte ao da súa publicación no Diario Oficial de Galicia.

Dado que os convenios coas entidades financeiras, a que fai referencia o artigo 5.1º se asinaron durante o mes de xullo, cómpre ampliar o prazo máximo de presentación de solicitudes establecido na citada Orde do 22 de xuño.

Por todo o exposto, e de acordo co establecido no artigo 30.1º.3 do Estatuto de autonomía de Galicia e no uso das facultades que me confiren a Lei 9/2007, do 13 de xuño, de subvencións de Galicia, e a Lei 1/1983, reguladora da Xunta e da súa Presidencia,

DISPOÑO:

Artigo único.

Esta orde ten por obxecto modificar o punto 7º do artigo 5 da Orde do 22 de xuño de 2010 pola que se establecen as bases reguladoras das axudas para a moratoria dos préstamos vinculados coa mellora de explotacións e incorporación das persoas mozas á actividade agraria, e se convocan para o ano 2010, que quedaría redactado como segue:

«Artigo 5º.-Xestión das subvencións.

7. O prazo de presentación de solicitudes rematará o 15 de setembro deste ano».

Santiago de Compostela, 6 de agosto de 2010.

Samuel Jesús Juárez Casado

Conselleiro do Medio Rural