O artigo 295 da Lei 30/2007, do 30 de outubro, de contratos do sector público, que configura as mesas de contratación como o órgano competente para a valoración de ofertas e como órgano de asistencia ao órgano de contratación, establece que os membros da mesa serán nomeados polo órgano de contratación.
Por outra parte, o Real decreto 817/2009, do 8 de maio, polo que se desenvolve parcialmente a Lei 30/2007, do 30 de outubro, de contratos do sector público, regula determinados aspectos relativos ás mesas de contratación, tanto no relativo a súa composición, como á designación con carácter permanente ou específico dos seus membros, publicidade dos integrantes, quórum para a súa constitución, etc.
Así mesmo, o artigo 160 dos Estatutos da Universidade de Vigo, aprobados polo Decreto 7/2010, do 14 de xaneiro (DOG do 2 de febreiro), establece que corresponde ao reitor exercer as competencias que a lexislación en materia de contratación administrativa, atribúe ao órgano de contratación, sen prexuízo das delegacións que por razón de eficacia poida realizar.
Por todo o antedito, coa finalidade de dar cumprimento ao establecido na normativa citada, e de conformidade co disposto no artigo 295 da Lei 30/2007, do 30 de outubro, no artigo 21 do Real decreto 817/2009, do 8 de maio, e nos artigos 160 e 161 dos Estatutos da Universidade de Vigo, acórdase ditar a seguinte resolución:
Primeiro.-Composición da mesa de contratación.
Desígnanse con carácter permanente os membros das mesas de contratación da Universidade de Vigo que se sinalan a seguir:
-Presidencia: será exercida polo vicerreitor de Economía e Planificación, que poderá ser substituído nos casos de vacante, ausencia ou enfermidade polo titular de calquera dos outros vicerreitorados.
-Vogal: o/a presidente/a do Consello Social ou persoa na que delegue.
-Vogal: o/a xerente/a da Universidade ou persoa en quen delegue.
-Vogal: o xefe da Asesoría Xurídica ou letrado dela.
-Vogal: o xefe do Servizo de Control Interno ou funcionario do servizo que o substitúa.
-Secretario/a: o/a xefe/a do Servizo de Xestión Económica e Contratación ou funcionario do servizo que o substitúa.
Esta designación enténdese feita sen prexuízo das que de xeito específico se poidan efectuar para a adxudicación de determinados contratos.
Segundo.-Normas de funcionamento da mesa de contratación.
A mesa de contratación reunirase, logo de convocatoria, coa periodicidade que requiran os diferentes expedientes de contratación. Para a súa válida constitución deberán estar presentes a maioría absoluta dos seus membros ente os que teñen que estar, necesariamente, a representación de Asesoría Xurídica e do Servizo de Control Interno. Os seus acordos adoptaranse por maioría de votos.
Supletoriamente, o seu funcionamento rexerase polo establecido para os órganos colexiados no capítulo II do título II da Lei 30/1992, do 26 de novembro, de réxime xurídico das administracións públicas e do procedemento administrativo común.
Terceiro.-Modificación dos pregos.
Os pregos tipo de cláusulas administrativas particulares deberán recoller a nova composición establecida nesta resolución.
Cuarto.-Publicación e data de efectos.
Esta resolución entra en vigor a partir do día seguinte ao da súa publicación no Diario Oficial de Galicia.
Vigo, 5 de xullo de 2010.
Salustiano Mato de la Iglesia
Reitor da Universidade de Vigo