O Decreto 177/2000, do 22 de xuño, polo que se regula a creación e autorización dos comités de ética asistencial, estableceu na súa disposición adicional primeira que por orde da Consellería de Sanidade se establecerían a creación, composición e funcións da Comisión Galega de Bioética, cuxo ámbito xeográfico e institucional de actuación é a Comunidade Autónoma de Galicia e que actúa como órgano asesor da consellería nesta materia.
Tendo en conta esta previsión regulamentaria, por Orde do 13 de febreiro de 2001 creouse a Comisión Galega de Bioética como órgano colexiado de carácter permanente e consultivo, dependente da Consellería de Sanidade, adscrito actualmente á Dirección de Asistencia Sanitaria do Servizo Galego de Saúde.
A mesma orde estableceu no seu artigo 9 que a Comisión Galega de Bioética deberá aprobar un regulamento interno en que se estableza a periodicidade de reunión, que deberá ser, polo menos, semestral, e que se axustará ás previsións da Lei 30/1992, do 26 de novembro, de réxime xurídico das administracións públicas e do procedemento administrativo común, no que se refire ás regras básicas de funcionamento dos órganos colexiados.
Emprendida a tarefa de impulsar o funcionamento do órgano consultivo antes citado e dotalo do necesario regulamento de funcionamento, cómpre realizar algúns axustes na normativa aplicable, co obxecto de que o dito regulamento, xunto coas disposicións regulamentarias vixentes, formen un corpo normativo homoxéneo, concordante e harmónico para servir con eficacia á finalidade prevista coa normativa.
Por tal motivo, no uso das facultades que me confiren os artigos 36.4º e 38 da Lei 1/1983, do 22 de febreiro, reguladora da Xunta e da súa Presidencia, modificada pola Lei 11/1988, do 20 de outubro, en relación coa disposición adicional primeira do Decreto 177/2000, do 22 de xuño, polo que se regula a creación e autorización dos comités de ética asistencial,
DISPOÑO:
Artigo 1º.-Modificación do artigo 1 da Orde do 13 de febreiro de 2001 pola que se crea a Comisión Galega de Bioética.
Modifícase o artigo 1 da orde citada, que queda redactado como segue:
«Artigo 1º.-Creación e ámbito de actuación.
Créase a Comisión Galega de Bioética como órgano colexiado de carácter permanente e consultivo, dependente da Consellería de Sanidade, adscrito á Dirección de Asistencia Sanitaria do Servizo Galego de Saúde.
O seu ámbito de actuación será o da Comunidade Autónoma galega.»
Artigo 2º.-Modificación do artigo 2, alínea f), da Orde do 13 de febreiro de 2001 pola que se crea a Comisión Galega de Bioética.
Modifícase a alínea f) do artigo 2 da citada orde, que queda redactado como segue:
«f) Calquera outra que lle sexa encomendada ou solicitada pola persoa titular da Consellería de Sanidade, ou que veña determinada no correspondente regulamento interno.»
Artigo 3º.-Modificación do artigo 4 da Orde do 13 de febreiro de 2001 pola que se crea a Comisión Galega de Bioética.
Modifícase o artigo 4 da citada orde, que quedará redactado do seguinte xeito:
«Artigo 4º.-Presidente/a.
O/a presidente/a da Comisión Galega de Bioética será a persoa titular da Dirección de Asistencia Sanitaria do Servizo Galego de Saúde, ou persoa en quen delegue.
Son funcións do/a presidente/a coordinar as reunións e ordenar a súa convocatoria, e todas as demais que lle asignen o Regulamento de réxime interno da comisión e o artigo 23 da Lei 30/1992, do 26 de novembro, de réxime xurídico das administracións públicas e do procedemento administrativo común.»
Artigo 4º.-Modificación do artigo 6 da Orde do 13 de febreiro de 2001 pola que se crea a Comisión Galega de Bioética.
Modifícase o artigo 6 da citada orde, que quedará redactado como segue:
«Artigo 6º.-Nomeamento e cesamento dos vogais.
Os/as vogais da Comisión Galega de Bioética serán nomeados/as e cesados/as mediante orde da persoa titular da Consellería de Sanidade.
Os/as vogais serán nomeados/as por un período de tres anos, renovable por un período igual, sen prexuízo doutras causas de cesamento ou substitución establecidas no artigo seguinte.»
Artigo 5º.-Introdución dun artigo 6 bis na Orde do 13 de febreiro de 2001 pola que se crea a Comisión Galega de Bioética.
Engádese un artigo 6 bis na citada orde, coa seguinte redacción:
«Artigo 6º bis.-Causas de cesamento e substitución dos membros da comisión.
1. Serán causas de cesamento dos/as membros da Comisión Galega de Bioética as seguintes:
a) Transcurso do tempo para o cal foron nomeados/as.
b) Renuncia expresa presentada por escrito ante a presidencia da comisión.
c) Incapacidade declarada xudicialmente.
d) Falecemento.
e) Acordo expreso da autoridade competente para o seu nomeamento.
f) Incumprimento reiterado das obrigas.
2. Cando un membro da comisión cese por algunha das causas indicadas anteriormente, esta poderá designar un substituto/a, en tanto se procede á cobertura da vacante do xeito establecido no artigo precedente.»
Disposición derrogatoria
Quedan derrogadas cantas disposicións de igual ou inferior rango se opoñan ao establecido nesta orde.
Disposicións derradeiras
Primeira.-Facúltase o secretario xeral da Consellería de Sanidade para adoptar as medidas necesarias para a aplicación, desenvolvemento e execución do disposto nesta orde.
Segunda.-Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 25 de xuño de 2010.
María Pilar Farjas Abadía
Conselleira de Sanidade