A Lei 8/1993, do 23 de xuño, reguladora da Administración hidráulica de Galicia, creou a Empresa Pública de Obras e Servizos Hidráulicos, como entidade de dereito público con personalidade xurídica propia que ten por obxecto a xestión de obras e a prestación de servizos, dentro do programa de actuacións da Administración hidráulica de Galicia.

De acordo coa dita lei, o Consello da Xunta de Galicia procedeu á aprobación dos estatutos da Empresa Pública de Obras e Servizos Hidráulicos determinando o momento de inicio da súa actividade, que foi o 1 de xuño de 1996. Estes estatutos, do 7 de marzo de 1996, recollen no seu artigo 9 as atribucións do presidente do ente público.

O artigo 12 da Lei 30/1992, do 26 de novembro, de réxime xurídico das administracións públicas e do procedemento administrativo común, establece que a competencia é irrenunciable e exercerana expresamente polos órganos administrativos que a teñan atribuída como propia, salvo nos casos de delegación ou avocación.

Pola súa banda o artigo 17 da dita lei establece a posibilidade de atribuír temporalmente o exercicio das competencias que, de acordo co ordenamento xurídico, corresponden a un órgano administrativo vacante ou cuxo titular se atopa ausente ou enfermo, a outro órgano administrativo por parte do órgano competente para o nomeamento daquel.

A inminente ausencia da presidenta da Empresa Pública de Obras e Servizos Hidráulicos correspondente ao permiso por causa xustificada previsto no artigo 76 do Decreto lexislativo 1/2008, do 13 de marzo, polo que se aproba o texto refundido da Lei de función pública de Galicia, fai preciso atribuír, mentres dure tal circunstancia, o exercicio das súas competencias a outro órgano administrativo, co fin de continuar co normal funcionamento dos servizos do ente público.

Na súa virtude e en virtude do previsto no artigo 17 da Lei 30/1992, do 26 de novembro, de réxime xurídico das administracións públicas e do procedemento administrativo común,

DISPOÑO:

1. Encomendar o exercicio das funcións propias da presidencia da Empresa Pública de Obras e Servizos Hidráulicos á persoa titular da Xefatura de Sección de Xestión da EPOSH.

2. Esta orde estenderá os seus efectos durante a ausencia da presidenta da Empresa Pública de Obras e Servizos Hidráulicos correspondente ao permiso por causa xustificada previsto no artigo 76 do Decreto lexislativo 1/2008, do 13 de marzo, polo que se aproba o texto refundido da Lei de función pública de Galicia.

3. Os actos e resolucións administrativas que se diten en exercicio desta suplencia farán constar expresamente tal circunstancia.

Santiago de Compostela, 6 de xullo de 2010.

Agustín Hernández Fernández de Rojas

Conselleiro de Medio Ambiente, Territorio

e Infraestruturas