O Consello de Dirección do Igape, na súa xuntanza do 2 de xuño de 2009, acordou aprobar as bases reguladoras das axudas para a habilitación de tres liñas de financiamento subsidiado para microempresas, proxectos emprendedores e investimentos das pemes para a mellora competitiva na Comunidade Autónoma de Galicia, instrumentadas mediante convenio de colaboración entre o Igape, as sociedades de garantía recíproca e as entidades financeiras adheridas (Programa Re-Imaxina).

As ditas bases fixéronse públicas mediante Resolución do 22 de xullo de 2009 (DOG nº 148, do 30 de xullo), e, segundo o artigo 21, entraron en vigor o día seguinte ao da súa publicación e estableceuse como data de fin de prazo para presentar solicitudes o 30 de decembro de 2009, a cal foi ampliada mediante Resolución do 19 de xaneiro de 2010 ata o 30 de xuño de 2010 por acordo do Consello de Dirección do Igape do 23 de xullo de 2009 (DOG nº 15, do 25 de xaneiro de 2010).

Debido á coxuntura económica xeral, os investimentos que estas bases apoian, víronse reducidos significativamente neste período, e polo tanto a demanda dos préstamos que se subvencionan viuse tamén reducida, sen que existan perspectivas de que o crédito orzamentario previsto para estas axudas se esgote coas solicitudes que se presenten no referido prazo.

A pesar destas circunstancias, estas liñas de financiamento considéranse un instrumento de grande importancia para o acceso ao financiamento das microempresas e as pemes galegas, que debe permanecer á súa disposición. En consecuencia, o prazo para presentar solicitudes debe modificarse, permitindo que poidan presentarse solicitudes ata o día 30 de decembro de 2010.

O Consello de Dirección do Igape, na súa xuntanza do 29 de xuño de 2010, acordou a modificación das bases reguladoras das axudas para a habilitación de tres liñas de financiamento subsidiado para microempresas, proxectos emprendedores e investimentos das pemes para a mellora competitiva na Comunidade Autónoma de Galicia, instrumentadas mediante convenio de colaboración entre o Igape, as sociedades de garantía recíproca e as entidades financeiras adheridas (Programa Re-Imaxina).

Por todo o anterior e en virtude das facultades que teño conferidas

RESOLVO:

Primeiro.-Publicar a modificación das bases reguladoras das axudas para a habilitación de tres liñas de financiamento subsidiado para microempresas, proxectos emprendedores e investimentos das pemes para a mellora competitiva na Comunidade Autónoma de Galicia, instrumentadas mediante convenio de colaboración entre o Igape, as sociedades de garantía recíproca e as entidades financeiras adheridas (Programa Re-Imaxina), no seguinte sentido:

Único.-Modificar a redacción do artigo 21, que queda redactado do seguinte xeito:

«Artigo 21º.-Prazo de presentación de solicitudes.

O prazo de presentación de solicitudes iniciarase o día seguinte ao da publicación destas bases reguladoras no Diario Oficial de Galicia e finalizará o 30 de decembro de 2010. No caso de esgotamento do crédito o Igape publicará a dita circunstancia no Diario Oficial de Galicia e na páxina web do Igape, en cumprimento do previsto no artigo 32 do Decreto 11/2009, do 8 de xaneiro, polo que se aproba o regulamento da Lei 9/2007, do 13 de xuño, de subvencións de Galicia, co fin de pechar anticipadamente o prazo de presentación de solicitudes».

Segundo.-Esta resolución entrará en vigor o día da súa publicación no Diario Oficial de Galicia.

Santiago de Compostela, 30 de xuño de 2010.

Joaquín Varela de Limia de Cominges

Director xeral do Instituto Galego

de Promoción Económica