A Organización de Productores Artesanales de Galicia (Opag) presentou ante a Consellería do Mar solicitude de recoñecemento como OPP no sector do cerco e das artes menores.
Na revisión do expediente tívose en conta o Regulamento (CE) nº 104/2000, polo que se establece a Organización Común de Mercados no sector dos produtos da pesca e da acuicultura; o Regulamento (CE) nº 2318/2001, no referente ao recoñecemento das organizacións de produtores no sector da pesca e da acuicultura e o Real decreto 724/2003, polo que se regulan as organizacións de produtores da pesca e da acuicultura e as súas asociacións.
O artigo 5 do Real decreto 724/2003, establece que o recoñecemento dunha organización de produtores corresponde aos órganos competentes das CC.AA., cando se trate de organizacións que obteñan o 95% ou máis da súa produción no seu ámbito territorial e, polo menos, o 80% desta sexa obtida por unidades de produción radicadas nesa comunidade autónoma. Amba as dúas premisas son cumpridas por OPAGA.
Por todo o antedito, facendo uso das facultades que me confire o artigo 34 da Lei 1/1983, do 22 de febreiro, de normas reguladoras da Xunta e da súa Presidencia
DISPOÑO:
Artigo 1º
Recoñecer a Organización de Productores Artesanales de Galicia (Opaga) como organización de produtores, e será o seu ámbito de actuación a Comunidade Autónoma de Galicia.
Artigo 2º
Opaga comprométese a cumprir coas obrigas das organizacións de produtores pesqueiros establecidas na lexislación vixente.
Artigo 3º
O incumprimento de calquera das condicións que permitiron o seu recoñecemento será causa de retirada deste.
Disposición derradeira
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 30 de xuño de 2010.
Rosa Quintana Carballo
Conselleira do Mar