Primeiro.
Comunícase que está aberto o prazo para posibles interinidades ou substitucións para cubrir prazas de profesores especialistas en ensinanzas deportivas, especialidade de baloncesto.
Titulación: técnico deportivo superior en baloncesto ou equivalente (adestrador nacional) con experiencia como adestrador. Terán preferencia os que, ademais, sexan licenciados na actividade física e o deporte ou equivalente (INEF).
Segundo.-Prazo de solicitude.
O prazo para presentar a instancia de solicitude, na Consellería de Educación e Ordenación Universitaria ou nos seus departamentos territoriais, será de dez días naturais contados a partir do día seguinte ao da publicación deste anuncio no DOG.
Terceiro.-Modelo de solicitude.
O modelo de solicitude poderá ser recollido na Consellería de Educación e Ordenación Universitaria, nos seus departamentos territoriais e tamén está á disposición na páxina web da consellería, http://www.edu.xunta.es (profesores/as; xestión de profesorado).
Cuarto.-Comisión baremadora.
A asignación da puntuación que lles corresponde aos concursantes será efectuada por unha comisión constituída por funcionarios destinados na Consellería de Educación e Ordenación Universitaria. Esta comisión estará cualificada na categoría primeira para os efectos do previsto no Decreto 144/2001, do 7 de xuño (DOG do 25 de xuño).
Poderá asistir ás reunións da comisión, con voz e sen voto, un representante por cada unha das organizacións sindicais con presenza na mesa sectorial docente non universitaria.
Quinto.-Requisitos dos candidatos.
-Estar en posesión da titulación e experiencia especificado na base primeira.
-Acreditar o certificado de lingua galega 4 (Celga 4) ou equivalente.
Non obstante o anterior, poderán presentar solicitudes aquelas persoas que, posuíndo a titulación sinalada, non posúan o certificado de lingua galega 4 ou equivalente. Estes candidatos poderán ser seleccionados, en defecto de candidatos que si o acrediten. Neste caso, de seren seleccionados, os candidatos deberán superar, no prazo máximo de dous anos desde que sexan nomeados, o certificado de lingua galega 4 (Celga 4) ou equivalente. A superación do devandito certificado deberá comunicarse á Subdirección Xeral de Recursos Humanos da Consellería de Educación e Ordenación Universitaria.
Sexto.
O baremo de acordo coa addenda asinada cos sindicatos da Mesa Sectorial Docente o 11 de xullo de 2006 será o publicado na fase de concurso do último concurso-oposición convocado no DOG.
Santiago de Compostela, 30 de xuño de 2010.
José Manuel Pinal Rodríguez
Director xeral de Centros e Recursos Humanos
