Antecedentes de feito.

Primeiro.-Con data do 7 de xullo de 1994, a Dirección Xeral de Industria resolveu autorizar administrativamente unha planta de coxeración que Orember, S.A. promovía en San Cibrao das Viñas (Ourense), aprobar o seu proxecto de execución e concederlle a condición de autoxerador eléctrico.

Segundo.-Con data do 6 de febreiro de 1995, a Dirección Xeral de Industria resolveu aprobar o proxecto reformado de execución da planta de coxeración citada. As características técnicas básicas eran:

-Dous motores diésel de combustión interna de fuel-oil, de 6.750 kW de potencia c/u a 750 rpm.

-Dous xeradores eléctricos síncronos de 7.450 kVA c/u, tensión de xeración 6 kV a 750 rpm.

-Un centro de transformación de 16 MVA, tensión 20/6 kV.

-Equipamentos auxiliares de protección, control e manobra.

Terceiro.-Con data do 5 de setembro de 1995, a Dirección Xeral de Industria resolveu autorizar o cambio de titularidade da instalación de Orember, S.A. a favor de Gallega de Cogeneración, S.A.

Cuarto.-Con data do 19 de xaneiro de 2010, Gallega de Cogeneración, S.A. solicitou autorización administrativa, aprobación do proxecto de execución e inclusión no réxime especial de produción de enerxía eléctrica dunha modificación substancial da instalación de coxeración citada.

Quinto.-Con data do 3 de marzo de 2010 publicouse no Diario Oficial de Galicia nº 42, e con data do 10 de marzo de 2010 no BOP de Ourense nº 56, a solicitude indicada no antecedente de feito cuarto, sen que se presentase ningunha alegación. As características son as seguintes:

-Solicitante: Gallega de Cogeneración, S.A., CIF A-32199044, domicilio no polígono industrial de San Cibrao das Viñas, s/n, 32911 San Cibrao das Viñas (Ourense).

-Solicitude de autorización administrativa, aprobación do proxecto de execución e renovación do réxime especial dunha modificación substancial da planta de coxeración existente mantendo a súa potencia actual de 14.900 kVA, asociada ao proceso produtivo da fábrica Orember, S.A., dedicada á transformación de madeira que produce taboleiro de fibra MDF.

-Obxecto: complementar os métodos actuais de consumo de enerxía eléctrica e de xeración de enerxía térmica para optimizar o consumo enerxético primario, coa mellora do rendemento eléctrico equivalente e unha menor emisión de partículas. Renovación da inscrición actual como produtor en réxime especial nº RE-99-28.

-Descrición dos traballos: conversión dos motores diésel actuais a Low-NOx; os motores son de Wartsila, modelo 18V32E, e serán actualizados ao modelo 18V32LN, cambiando os elementos necesarios para iso, ademais do mecanizado das culatas e da adición de sensores de temperatura de chumaceiras de cabeza de biela e sistema de monitorización con pantalla local. Dotación dun novo sistema común de bombeo, que alimentará ambos os aproveitamentos, e de novos intercambiadores de placa, un en cada motor, melloras no sistema de adición de aire de combustión a caldeiras e na preparación de auga.

-Orzamento: 1.524.566 €.

Sexto.-Con data do 9 de abril de 2010, o Departamento Territorial da Consellería de Economía e Industria de Ourense emitiu informe favorable á solicitude presentada.

Fundamentos de dereito.

Primeiro.-O artigo 28 da Lei 54/1997 establece que a construción, explotación, modificación substancial, a transmisión e o peche de instalacións de produción de enerxía eléctrica en réxime especial estarán sometidos ao réxime de autorización administrativa previa, que terá carácter regrado, e corresponderalle seu outorgamento á Administración autonómica.

Segundo.-O artigo 4.1º do Decreto 661/2007, do 25 de maio, polo que se regula a actividade de produción de enerxía eléctrica en réxime especial, establece que o recoñecemento da condición de instalación de produción acollida ao réxime especial de produción de enerxía eléctrica correspóndelle aos órganos das comunidades autónomas.

Terceiro.-O artigo 28 do Decreto 324/2009, do 11 de xuño, polo que se establece a estrutura orgánica da Consellería de Economía e Industria, atribúe á Dirección Xeral de Industria, Enerxía e Minas a dirección, coordinación, planificación, execución, seguimento e control das competencias e funcións da consellería en materia de enerxía.

Cuarto.-Na tramitación tivéronse en conta as normas de procedemento contidas no Real decreto 1955/2000, do 1 de decembro, no Real decreto 661/2007, do 25 de maio, na Lei 30/1992, do 26 de novembro, de réxime xurídico das administracións públicas e do procedemento administrativo común e demais normas vixentes de aplicación.

De acordo co que antecede, tendo en conta que nesta petición concorren os supostos de feito e xurídicos contidos nos preceptos legais e regulamentarios citados,

RESOLVO:

Primeiro.-Autorizar administrativamente a Gallega de Cogeneración, S.A. a modificación substancial da instalación de coxeración que posúe en San Cibrao das Viñas (Ourense).

Segundo.-Aprobar o proxecto de execución da dita modificación substancial, Modificación motores según proceso Low-NOx en Gallega de Cogeneración, S.A. y mejora de aprovechamientos térmicos, asinado polo enxeñeiro industrial José Manuel Fernández Bouzo, colexiado nº 859, e visado polo Ilustre Colexio Oficial de Enxeñeiros Industriais de Galicia, A Coruña o 7 de xaneiro de 2010, co nº CO100005.

Terceiro.-Recoñecerlle á modificación substancial da instalación que por esta resolución se autoriza a condición de instalación acollida ao réxime especial de produción de enerxía eléctrica regulado polo Real decreto 661/2007, do 25 de maio, e encadrala no subgrupo a.1.2 do artigo 2 do dito real decreto.

Todo isto de acordo coas seguintes condicións:

Primeira.-As instalacións que se autorizan terán que realizarse de acordo coas especificacións e planos que figuran no proxecto que por esta resolución se aproba e referido no punto segundo da parte dispositiva desta.

Segunda.-Para introducir modificacións nas instalacións que afecten datos básicos do proxecto será necesaria a previa autorización desta dirección xeral. Pola súa banda, o Departamento Territorial da Consellería de Economía e Industria de Ourense poderá autorizar as modificacións de detalle do proxecto que resulten procedentes, e deberá comunicarlle a este centro directivo todas as resolucións que dite en aplicación da dita facultade.

Terceira.-O prazo para a posta en servizo das instalacións que se autorizan será de seis meses contados a partir da data de notificación desta resolución.

Cuarta.-Unha vez construídas as instalacións autorizadas, o Departamento Territorial da Consellería de Economía e Industria de Ourense inspeccionará a totalidade das obras e montaxes efectuadas e verificará o cumprimento dos compromisos contraídos por Gallega de Cogeneración, S.A.

Quinta.-Con carácter previo á posta en servizo das instalacións, o órgano competente verificará o cumprimento das condicións impostas nesta resolución.

Sexta.-A Administración resérvase o dereito de deixar sen efecto esta autorización por calquera das causas establecidas no artigo 34 do Decreto 1775/1967, do 22 de xullo, sobre réxime de instalación, ampliación e traslado de industrias, ou por incumprimento das condicións impostas.

Sétima.-Esta autorización outórgase sen prexuízo de terceiros e independentemente das autorizacións, licenzas ou permisos de competencia municipal, provincial ou outros necesarios para a realización das obras das instalacións autorizadas.

Oitava.-Como requisito necesario para a aplicación do réxime especial á dita modificación substancial da instalación, o titular e/ou explotador deberá inscribila no Rexistro de Instalacións de Produción de Enerxía Eléctrica en Réxime Especial da Comunidade Autónoma de Galicia, creado pola orde da Consellería de Industria e Comercio do 5 de xullo de 1995 (DOG do 14 de xullo), para o cal acreditará o cumprimento das condicións previstas no artigo 12 do Real decreto 661/2007, do 25 de maio, e presentará a documentación que figure nas instrucións que dite esta dirección xeral en desenvolvemento da citada orde.

Contra esta resolución, que non é definitiva en vía administrativa, poderase interpoñer recurso de alzada perante o conselleiro de Economía e Industria da Xunta de Galicia, no prazo dun mes contado a partir do día seguinte ao da súa notificación, de conformidade cos artigos 114 e 115 da Lei 30/1992, do 26 de novembro, de réxime xurídico das administracións públicas e do procedemento administrativo común.

Santiago de Compostela, 9 de xuño de 2010.

Ángel Bernardo Tahoces

Director xeral de Industria, Enerxía e Minas