O Consello de Dirección do Instituto Galego de Promoción Económica (Igape), na súa xuntanza do día 8 de febreiro de 2008, acordou por unanimidade dos membros asistentes a aprobación da base reguladora dos incentivos a proxectos de investimento empresarial.

Mediante Resolución do 12 de marzo de 2008 procedeuse á publicación da dita base, á convocatoria de varios programas de axuda e á publicación dos créditos asignados a cada un deles (DOG nº 55, do 18 de marzo).

Mediante Resolución do 5 de febreiro de 2009 (DOG nº 31, do 13 de febreiro) modificáronse as bases para adaptalas ao Regulamento (CE) 800/2008, do 6 de agosto, xeral de exención por categorías, e estableceuse no seu punto sexto que, á vista do volume das solicitudes presentadas para cada liña, o director xeral do Igape poderá redistribuír os créditos aprobados, amplialos, así como modificar as partidas orzamentarias mediante resolución publicada para o efecto.

Tendo en conta o volume de solicitudes recibidas e tratando de dar resposta á ampla demanda de axuda, semella oportuno incrementar o importe aprobado para os seguintes programas:

-Proxectos de investimento empresarial superior a 500.000 € (procedemento IG100).

-Proxectos de servizos avanzados intensivos en emprego (procedemento IG101).

Na súa virtude, e de conformidade coas facultades que teño conferidas,

RESOLVO:

Único.-Amplíase en 6.000.000 € o crédito para o exercicio 2010 e en 6.000.000 € para o exercicio 2011 para os proxectos de investimento empresarial superior a 500.000 € (procedemento IG100) e de servizos avanzados intensivos en emprego (procedemento IG101), con cargo á partida orzamentaria E2/10/02-656700, resultando o crédito dispoñible de 26.000.000 € para o exercicio 2010 e 6.000.000 € para o exercicio 2011.

Santiago de Compostela, 10 de xuño de 2010.

Joaquín Varela de Limia de Cominges

Director xeral do Instituto Galego de Promoción Económica