Considerando, a Resolución do 3 de maio de 2010 pola que se convocan os cursos para o persoal ao servizo das entidades locais de Galicia (DOG nº 86, do 7 de maio), na base cuarta, letra F e na base oitava, letra D desta, referentes ás facultades da Escola Galega de Administración Pública.

Á vista do elevado número de vacantes observadas no curso «LO10031 sobre xestión de infraestruturas deportivas e equipamentos comunitarios».

Co obxecto de ampliar a formación do persoal ao servizo da Administración autonómica.

RESOLVO:

-Abrir un novo prazo de presentación de solicitudes, de dez días naturais contados a partir da publicación da presente resolución no Diario Oficial de Galicia, na segunda edición do curso «LO10031 sobre xestión de infraestruturas deportivas e equipamentos comunitarios», que se celebrará en Santiago de Compostela, os días 14, 16, 21 e 23 de setembro de 2010.

-Ampliar os destinatarios do mencionado curso ao persoal dependente da Administración autonómica cuxo posto de traballo estea relacionado coa materia obxecto do curso.

-Modificar os obxectivos e contido do mencionado curso, tal e como se detalla no anexo que acompaña a presente resolución.

-Proceder á súa publicación no Diario Oficial de Galicia.

Santiago de Compostela, 16 de xuño de 2010.

Pablo Figueroa Dorrego

Director da Escola Galega de Administración Pública

ANEXO

1. Obxectivos.

«-Coñecer e intercambiar experiencias e instrumentos de actuación entre técnicos da Administración pública galega.

-Establecer un marco de reflexión sobre os custos derivados da xestión dos servizos deportivos e estudar os sistemas e mecanismos para aplicar o equilibrio financeiro nos proxectos de xestión deportiva.

-Análise da dimensión e o conxunto de alternativas existentes desde a perspectiva da xestión e posto en valor dos espazos deportivos públicos, así como as derivacións conseguintes en seguridade e responsabilidade.

-Análise das estratexias para abordar a xestión e a colaboración pública privada na xestión do deporte local.

2. Destinatarios.

Responsables das áreas de deporte da Administración autonómica e local.

4. Contido.

Introdución -Marco sobre a nova política deportiva galega. As políticas deportivas nas administracións públicas. Directrices e evolución. As instalacións deportivas: planificación, deseño e mantemento. Plan estratéxico deportivo local. O financiamento do deporte nas administracións públicas, ámbito local. Patrocinio e mecenato. Xestión da seguridade e instalacións, eventos e actividades deportivas. Sistemas de xestión do deporte no sector público. Experiencias de xestión entre o público e o privado. Criterios de calidade nos servizos deportivos públicos. Novas ferramentas ao servizo da xestión. As novas tecnoloxías.