A Lei 11/2008, do 2008, do 3 de decembro, de pesca de Galicia, modificada pola Lei 6/2009, do 11 de decembro, define no seu artigo 27 o marisqueo como «o exercicio da actividade extractiva, desenvolvida a pé ou desde embarcación, na zona marítima ou marítimo-terrestre dirixida de modo exclusivo e con artes selectivas e específicas á captura dunha ou varias especies de moluscos, crustáceos, tunicados, equinodermos e outros invertebrados mariños, con fins de comercialización».

O Decreto 423/1993, do 17 de decembro, polo que se refunde a normativa vixente en materia de marisqueo, extracción de algas e cultivos mariños, modificado polo Decreto 237/2002, do 11 de xullo, establece que a extracción de marisco e a recolección de algas estarán suxeitas ao Plan xeral de explotación marisqueira, aprobado con carácter anual pola Consellería de Pesca, Marisqueo e Acuicultura, hoxe Consellería do Mar.

Consecuencia da definición de marisqueo dada pola nova Lei de pesca de Galicia, a Orde do 22 de decembro de 2009 inclúe por primeira vez as medidas de xestión para a pesca do polbo para o ano 2010.

A Orde do 22 de decembro de 2009, pola que se aproba o Plan xeral de explotación marisqueira, establece os topes de capturas diferenciando o período comprendido entre o 1 de maio ao 30 de outubro e o resto da campaña. Consultado o sector afectado, considérase que o tope establecido para ambos os períodos non dá cobertura ás embarcacións que teñen máis de 5 tripulantes, polo que resulta conveniente aumentar estes topes.

No que atinxe ao horario de traballo, tamén se considera apropiado o seu cambio, atrasándoo unha hora, tanto no comezo como na finalización da actividade, xa que ao ser a nasa de polbo unha arte diúrna, o novo horario establecido nesta modificación da Orde do 22 de decembro resulta ser máis axeitado.

Por todo o exposto, logo de consultar o sector, por proposta da Dirección Xeral de Ordenación e Xestión dos Recursos Mariños, e en virtude das facultades que teño conferidas,

DISPOÑO:

Artigo único.-Modificación da Orde do 22 de decembro de 2009, pola que se aproba o Plan xeral de explotación marisqueira para o ano 2010.

A Orde do 22 de decembro de 2009, pola que se aproba o Plan xeral de explotación marisqueira para o ano 2010, queda modificada como segue:

Un.-O artigo 9.1º d) relativo ás consideracións xerais da regulación do polbo (Octopus vulgaris) queda redactado da seguinte maneira:

«d) Cotas máximas de capturas. Os topes serán diarios. Os topes que se indican a continuación poderán ser modificados se a situación do recurso así o require e tras a consulta co sector implicado. Do mesmo xeito, poderán establecerse topes de captura accesoria de polbo noutras artes de pesca.

-Desde o 1 de maio ao 30 de outubro establécese en 30 quilos por embarcación, a que se engadiran 30 quilos por cada tripulante enrolado e a bordo/día ata un máximo de 210 quilogramos/día.

-No resto da campaña extractiva o tope máximo de capturas establécese en 50 quilos por embarcación, a que se engadirán 50 quilos por cada tripulante enrolado e a bordo/día, ata un máximo de 350 quilogramos/día».

Dous.-O artigo 9.2º a) relativo ao horario de traballo das embarcacións con nasa de polbo queda modificado como segue:

«a) Horario de traballo: o horario será diúrno. A actividade desenvolverase diariamente das 7.00 ás 17.00 horas da tarde. O descanso semanal establécese desde as 17.00 horas do venres ata as 7.00 horas do luns».

Disposicións derradeiras

Primeira.-Facúltase a persoa titular da Dirección Xeral de Ordenación e Xestión dos Recursos Mariños para o desenvolvemento desta orde.

Segunda.-Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 15 de xuño de 2010.

Rosa María Quintana Carballo

Conselleira do Mar