Dentro do plan de actividades da Escola Galega de Administración Pública para o ano 2010 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócase, en colaboración coa Dirección Xeral de Avaliación e Reforma Administrativa, a Xornada sobre a modernización da Administración autonómica de Galicia, conforme as seguintes bases:
1. Obxectivos.
O obxectivo desta xornada sobre a modernización da Administración autonómica de Galicia é servir de foro de reflexión, discusión e análise acerca dos retos que se lle presentan á Xunta de Galicia neste comezo de século, co fin de dar resposta axeitada ás demandas crecentes da sociedade a que debe prestar servizo.
As características cambiantes do contorno socioeconómico, a existencia dunha forte crise económica, unha sociedade en constante evolución nas súas estruturas, o pulo das novas tecnoloxías e a globalización dos mercados e da información exixen unha nova relación entre os cidadáns e a Administración.
Nesta nova relación, conceptos tales como a transparencia na xestión, a austeridade, eficacia e control do gasto, a interoperabilidade ou a accesibilidade forman unha parte moi importante do rol que ten que asumir a Xunta de Galicia e exixirán de toda a súa organización (directivos e persoal) importantes esforzos de adaptación e a necesidade de afondar na súa formación nestas materias.
2. Contidos.
Serán tratados, entre outros, os seguintes temas:
-A formación como axente modernizador da Administración pública.
-O anteproxecto de Lei de organización e funcionamento da administración xeral e o sector público autonómico de Galicia.
-O réxime económico orzamentario e de control.
-A nova Lei da función pública de Galicia: principios inspiradores.
-A eficiencia na xestión pública: a avaliación de organismos dependentes da Xunta de Galicia.
-O desenvolvemento da Administración electrónica, un dereito dos cidadáns.
3. Destinatarios.
Persoal da Administración autonómica, persoal das restantes administracións públicas presentes en Galicia, interlocutores sociais e interesados en xeral.
4. Desenvolvemento.
Lugar: Escola Galega de Administración Pública (EGAP), rúa de Madrid, 2-4, Santiago de Compostela.
Data: 29 de xuño de 2010.
Duración: 6 horas lectivas.
5. Número de prazas.
Limitado pola capacidade do local.
6. Solicitudes.
-Tramitación de solicitudes: as solicitudes irán dirixidas ao director da Escola Galega de Administración Pública (polígono das Fontiñas, rúa Madrid, 2-4, CP 15707, Santiago de Compostela), segundo o modelo que figura como anexo a esta convocatoria, e serán presentadas no Rexistro Xeral da EGAP, ou ben de calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Serán admitidas inscricións por medio de fax enviado ao número 981 54 63 30 ou por correo electrónico dirixido ao enderezo novas.egap@xunta.es
-Inscricións fóra de prazo: só serán admitidas, de quedar prazas libres, coa condición de que cumpran os requisitos xerais antes indicados.
As persoas solicitantes poderán obter a confirmación da súa admisión se chaman por teléfono, das 8.30 ás 14.30 horas, aos seguintes números: 981 54 62 41, 881 99 70 14.
7. Prazo.
O prazo de presentación de solicitudes finalizará o luns 28 de xuño de 2010.
8. Modificacións.
A EGAP reserva para si a facultade de interpretar e de resolver as incidencias que poidan xurdir no desenvolvemento desta xornada, así como a facultade de cancelala se o escaso número de solicitudes non xustificase a súa realización.
9. Certificado de asistencia.
Será entregado un certificado de asistencia, ao final da xornada, a aquelas persoas inscritas que asistisen, sempre que a súa asistencia sexa igual ou superior ao 85% das horas lectivas programadas. Neste documento aparecerán de forma expresa a natureza da actividade e a data de realización.
Santiago de Compostela, 18 de xuño de 2010.
Pablo Figueroa Dorrego
Director da Escola Galega de Administración Pública
Ver referencia pdf "11700D010P063.PDF"