O Regulamento (CE) nº 1198/2006 do Consello, do 27 de xullo, relativo ao Fondo Europeo de Pesca, establece no artigo 36º que o devandito fondo poderá financiar medidas de interese público, e cita, entre estas, os proxectos piloto que despois se desenvolven no artigo 41º.

Ao abeiro do devandito regulamento, a Orde do 20 de outubro de 2008 establece as bases e regula o procedemento para a concesión de axudas para a realización dos proxectos piloto (DOG nº 211, do 30 de outubro). A devandita orde establece no seu artigo 6 un prazo de presentación de solicitudes ata o 30 de marzo, cuxa selección se resolverá nunha única proposta anual con anterioridade ao 31 de maio de cada ano.

Desde a publicación das devanditas bases, os expedientes presentados non puideron ser obxecto de resolución, polo que cómpre publicar a convocatoria do ano 2010 e, así, proceder a resolver os expedientes presentados ao abeiro da devandita orde reguladora. Por outra banda e dada a demora na resolución destas axudas, considérase oportuno modificar para a convocatoria do ano 2010 o prazo de presentación de solicitudes, así como tamén de selección dos expedientes.

Artigo 1º.-Convocatoria das axudas.

Convócanse axudas para o ano 2010 para a realización de proxectos piloto que se rexerán polas bases e procedemento establecidos na Orde do 20 de outubro de 2008 (DOG nº 211, do 30 de outubro); o prazo de presentación de solicitudes será o establecido na disposición transitoria.

Artigo 2º.-Crédito orzamentario.

1. Para o exercicio orzamentario 2010, as axudas para a realización de proxectos piloto outorgaranse con cargo á aplicación 14.02.723A.780.2, código de proxecto 2007.00579, que figura dotada no proxecto de orzamento de gastos da Consellería do Mar para o ano 2010. Os importes máximos das subvencións que se concedan no dito exercicio orzamentario ascenderán a 2.700.000 euros, distribuídos nas seguintes anualidades:

Anualidade 2010: 1.000.000 euros.

Anualidade 2011: 900.000 euros.

Anualidade 2012: 800.000 euros.

2. Este importe poderá ser ampliado en función das dispoñibilidades orzamentarias sen que iso dea lugar á apertura dun novo prazo de presentación de solicitudes, salvo indicación expresa en contrario, na orde que se publique para o efecto.

3. A concesión das correspondentes axudas queda sometida, en todo caso, á existencia de crédito adecuado e suficiente nos orzamentos xerais da Comunidade Autónoma de Galicia para o ano 2010 no momento da resolución.

Disposicións transitorias

Primeira.-As solicitudes que se presentasen ao abeiro da Orde do 20 de outubro de 2008 durante os anos 2008 e 2009 e que non recibisen resolución expresa respecto da subvencionabilidade do proxecto, deberán manifestar mediante escrito a súa intención de se acolleren á convocatoria do ano 2010, e o prazo da súa presentación rematará unha vez que transcorran 30 días contados desde o día seguinte ao da publicación desta convocatoria no Diario Oficial de Galicia.

Segunda.-O prazo de presentación de solicitudes de axuda nesta convocatoria do ano 2010 será desde o 1 de xaneiro de 2010 e rematará unha vez que transcorran 30 días desde o día seguinte ao da publicación desta convocatoria no Diario Oficial de Galicia.

Terceira.-O prazo para a resolución das axudas será de seis meses contados desde a data de publicación desta orde no Diario Oficial de Galicia, realizándose a selección dos expedientes antes do remate do devandito prazo.

Cuarta.-Debido ao cambio de competencias derivado do Decreto 312/2009, do 28 de maio, pola que se establece a estrutura orgánica da Consellería do Mar (DOG nº 109, do 5 de xuño), na tramitación destas axudas o Servizo de Ensino e Investigación Mariña será substituído polo Servizo de Innovación Tecnolóxica da Frota, a Subdirección de Ensino e Investigación Mariña pola Subdirección de Innovación Tecnolóxica e a Dirección Xeral de Innovación e Desenvolvemento Pesqueiro será substituída pola Dirección Xeral de Competitividade e Innovación Tecnolóxica.

Disposicións derradeiras

Primeira.-Facúltase a Dirección Xeral de Competitividade e Innovación Tecnolóxica para ditar as resolucións necesarias para o desenvolvemento desta orde.

Segunda.-Esta orde producirá efectos desde o día seguinte ao da súa publicación no Diario Oficial de Galicia.

Santiago de Compostela, 19 de maio de 2010.

Rosa María Quintana Carballo

Conselleira do Mar