A planificación de recursos humanos nas administraciones públicas ten como obxectivo contribuír á consecución da eficacia na prestación dos servizos e da eficiencia na utilización dos recursos económicos dispoñibles mediante a dimensión axeitada dos seus efectivos, a súa mellor distribución, formación, promoción profesional e mobilidade.
A Secretaría Xeral de Modernización e Innovación Tecnolóxica configúrase como un órgano superior da Administración autonómica, con ámbito de actuación sobre todas as consellerías, organismos delas dependentes, centros, servizos e unidades, así como sobre os entes e empresas públicas da Administración da comunidade autónoma, a que lle corresponde o impulso, asesoramento técnico e apoio en materia de tecnoloxías da información e as comunicacións e a súa aplicación para a modernización, innovación e desenvolvemento tecnolóxico de Galicia, e sinala que para poder facer efectiva a súa misión, e acadar os seus obxectivos, é imprescindible a dotación de prazas de persoal propio, para o exercicio das funcións de dirección e xestión de proxectos tecnolóxicos, tanto no ámbito de proxectos transversais como para o reforzo das diferentes iniciativas sectoriais que se están a pór en marcha, co obxecto de comezar a paliar o deficit histórico existente neste eido de desempeño profesional.
Nesta liña, a Dirección Xeral da Función Pública, de conformidade co novo Estatuto básico do empregado público, que recolle entre o seus fundamentos de actuación a eficacia na planificación e xestión dos recursos humanos nas administracións públicas, e tendo como premisas os criterios de máxima eficacia, austeridade e economía na organización administrativa, procedeu a realizar un estudo das prazas de informática vacantes e doutras prazas de grupos e categorías diferentes tamén vacantes, existentes nas consellerías, co fin de que estas prazas se amortizasen, e se creasen outras novas na Secretaría Xeral de Modernización e Innovación Tecnolóxica, cos perfís necesarios para a execución dos seus obxectivos.
Realizado o estudo económico, conclúese que, de conformidade coa información enviada polas consellerías, procede a amortización das prazas que nos documentos anexos se indican, e a creación das novas, para o exercicio das misións e tarefas encomendadas pola Secretaría Xeral de Modernización e Innovación Tecnolóxica.
En consecuencia, por proposta da Secretaría Xeral de Modernización e Innovación Tecnolóxica, consultadas as organizacións sindicais presentes na Mesa Xeral de Negociación da Comunidade Autónoma e a Comisión de Persoal, o Consello da Xunta de Galicia, na súa reunión do día 27 de maio de 2010, adoptou o seguinte
ACORDO:
Primeiro.-Aprobar o Plan de racionalización de recursos humanos para a creación de prazas de persoal funcionario na Secretaría Xeral de Modernización e Innovación Tecnolóxica, procedendo á amortización dos postos de traballo e creación dos postos necesarios na Secretaría Xeral de Modernización e Innovación Tecnolóxica, cos perfís axeitados para a execución dos seus obxectivos segundo figura no anexo.
Segundo.-Modificación das correspondentes relacións de postos de traballo con efectos do 1-6-2010, polo que as consellerías afectadas polas amortizacións reterán o crédito correspondente á dotación destas prazas desde esa data ata o 31-12-2010.
Terceiro.-Autorízase a conselleira de Facenda para ditar as resolucións e actos que procedan para a execución deste acordo.
Visto o acordo adoptado polo Consello da Xunta de Galicia na súa reunión do vinte e sete de maio de dous mil dez, relativo á aprobación dun plan de racionalización de recursos humanos para a creación de prazas de persoal funcionario na Secretaría Xeral de Modernización e Innovación Tecnolóxica, coa finalidade de cumprir o dito acordo, dispoño que se publique no Diario Oficial de Galicia como anexo a esta resolución.
Santiago de Compostela, 28 de maio de 2010.
Marta Fernández Currás
Conselleira de Facenda
Ver referencia pdf "10100D003P010.PDF"