Dentro das actividades programadas para o ano 2010, e conforme as funcións atribuídas pola Lei 1/2007, do 15 de xaneiro, da Academia Galega de Seguridade Pública, anúnciase a celebración dun curso selectivo de formación para vixilantes municipais, segundo o previsto no artigo 92.4º da Lei 4/2007, do 20 de abril, de coordinación das policías locais, e no artigo 49 do Decreto 243/2008, do 16 de outubro, que deberá desenvolverse de acordo coas seguintes bases:

Obxectivos.

Dotar os vixilantes municipais dunha formación específica que lles facilite a competencia e capacitación necesarias para o posterior desempeño da súa actividade profesional.

Destinatarios/as.

O curso vai dirixido a todas aquelas persoas que superasen as correspondentes probas de acceso ás prazas de vixilantes municipais dos diferentes concellos de Galicia.

Inscrición.

A inscrición é gratuíta.

A academia procederá a reservar definitivamente a correspondente praza segundo a comunicación da inscrición por parte do concello de procedencia.

Prazas.

Sen límite.

Solicitudes.

1. Os concellos deberán remitir un escrito á Academia Galega de Seguridade Pública solicitando as correspondentes prazas de reserva, con indicación das persoas que superaron as correspondentes probas de oposición ás prazas de vixilantes municipais e completar o anexo con todos os datos nel reflectidos referidos aos solicitantes de praza.

2. O prazo para a remisión de escritos rematará o día 8 de xuño de 2010.

3. Os escritos deberán enviarse á Academia Galega de Seguridade Pública: avenida da Cultura, s/n, 36680 A Estrada. Previamente remitiranse por fax (886 20 61 22) para axilizar os correspondentes trámites.

Duración e estrutura do curso.

O curso terá unha duración aproximada de 2 meses (250 horas lectivas) e desenvolverase de modo semipresencial.

O deseño deste curso inclúe os seguintes módulos:

- Módulo I: módulo xurídico

- Módulo II: módulo técnico

- Módulo III: módulo operativo

- Módulo IV: módulo transversal

A academia poderá, ademais, proceder á homologación de materias ou módulos do curso cando, despois da solicitude do/a alumno/a e a oportuna xustificación documental, se acredite ter desenvolvido ou superado as ditas materias ou módulos en cursos ou actividades de centros ou institucións dependentes das administracións públicas, ou de recoñecido prestixio e solvencia noutro caso.

Datas.

A data de inicio do curso será o día 14 de xuño ás 9.00 horas.

Desenvolvemento do curso.

O alumnado da Academia Galega de Seguridade Pública durante o seu período de permanencia nela rexerase polo seu regulamento de réxime interior, publicado pola Orde do 4 de febreiro de 2009, da Consellería de Presidencia, Administracións Públicas e Xustiza, no DOG do 12 de febreiro de 2009, número 30.

Certificado.

De acordo co previsto no artigo 19 do Decreto 243/2008, do 16 de outubro, de desenvolvemento da Lei 4/2007, unha vez superado o curso, a Agasp emitirá un informe certificando a devandita superación, de modo que o concello de pertenza poida proceder ao nomeamento como persoal funcionario de carreira e á toma de posesión como vixilante municipal.

Modificacións.

A Academia Galega de Seguridade Pública poderá modificar o desenvolvemento normal do curso para adaptalo ás necesidades da Administración e ás continxencias que poidan xurdir.

A Estrada, 19 de maio de 2010.

José Carlos García Bouzas

Director xeral da Academia Galega de Seguridade

Pública

Ver referencia pdf "09900D003P008.PDF"