Dentro das actividades programadas para o ano 2010 e conforme as funcións atribuídas pola Lei 1/2007, do 15 de xaneiro, da Academia Galega de Seguridade Pública, anúnciase a realización dun curso de formación para persoal de control de accesos a espectáculos públicos e actividades recreativas que se desenvolverá de acordo coas seguintes bases:
1. Datos da actividade.
Denominación: formación para persoal de control de accesos a espectáculos públicos e actividades recreativas.
Tipo: curso.
Horas lectivas: 25.
Modalidade: presencial.
Obxectivos.
Dotar o persoal de control de accesos a espectáculos públicos e actividades recreativas da formación prevista no programa anexo do Decreto 8/2010, do 21 de xaneiro, polo que se regula a actividade de control de acceso a espectáculos públicos e actividades recreativas (DOG nº 24, do 5 de febreiro), coa finalidade de que as persoas participantes no curso poidan adquirir os coñecementos necesarios para superar as probas previstas no artigo 5 do decreto que deberá convocar a AGASP. A superación destas probas é un requisito necesario para obter a habilitación correspondente prevista no artigo 6 do dito decreto para o posterior desempeño da súa actividade profesional.
Contido.
O contido do curso consistirá na explicación teórica e práctica do temario necesario para superar as probas que permiten obter a habilitación de persoal de control de accesos a espectáculos públicos e actividades recreativas (anexo I do Decreto 8/2010, do 21 de xaneiro), xunto coa mellora das habilidades persoais para afrontar as probas psicolóxicas.
2. Desenvolvemento da convocatoria.
Destinatarios/as.
O curso vai dirixido a todas aquelas persoas interesadas en obter a preparación necesaria para superar as probas previstas no artigo 5 do Decreto 8/2010, do 21 de xaneiro, e na Orde do 21 de abril de 2010 pola que se aproban as bases xerais das probas para a obtención da habilitación do persoal de control de acceso a espectáculos públicos e actividades recreativas (DOG nº 78, do 27 de abril).
Prazas e criterios de selección.
O número máximo de prazas será de 100, repartidas en dous grupos de 50 e quendas individuais de mañá e tarde, e o criterio de selección dos/as aspirantes será exclusivamente a orde de chegada das solicitudes.
Reservarase un 50% das prazas para as solicitantes femininas, segundo o disposto no artigo 37.bis da Lei 7/2004, do 16 de xullo, galega de igualdade de mulleres e homes.
Para o desenvolvemento do curso, será necesario que cada grupo conste polo menos 15 de alumnos/as. De non acadarse o número mínimo antedito, a Academia Galega de Seguridade Pública reserva para si o dereito a suspender o citado curso.
3. Solicitudes de participación.
Prazo de inscrición e presentación.
O prazo de presentación de solicitudes será de 10 días hábiles, que empezará a contarse desde o día seguinte ao da publicación desta resolución.
As persoas interesadas deberán cubrir o modelo de solicitude que se xunta como anexo á presente resolución.
Todos/as os/as aspirantes que desexen realizar o curso deberán presentar unha solicitude debidamente cuberta e axustada ao modelo oficial que se publica no anexo desta resolución e que lles será facilitada nas dependencias da AGASP (avda. da Cultura, s/n, A Estrada, Pontevedra). Tamén poderán obter a dita solicitude a través da páxina web da AGASP http://agasp.xunta.es/ na epígrafe «actividades formativas», «cursos con inscrición aberta».
Deberán así mesmo entregar unha fotocopia compulsada do seu DNI, no caso de que o/a interesado/a non autorice expresamente a comprobación dos datos por medio do acceso telemático ao sistema de verificación de datos de identidade do Ministerio da Presidencia. Os/as aspirantes que non posúan a nacionalidade española deberán presentar unha fotocopia compulsada do documento que acredite a súa nacionalidade e, no suposto de non pertenceren á Unión Europa, da tarxeta de residencia e do permiso de traballo en vigor.
As solicitudes poderán presentarse nos seguintes lugares:
a) No rexistro da Academia Galega de Seguridade Pública (avda. da Cultura, s/n, A Estrada, Pontevedra).
b) No rexistro xeral da Xunta de Galicia (San Caetano, Santiago de Compostela).c) En calquera das formas e lugares previstos no artigo 38 da Lei 30/1992, do 26 de novembro, de réxime xurídico das administracións públicas e do procedemento administrativo común.
Listaxe de solicitudes seleccionadas.
Expirado o prazo de presentación de solicitudes, a Dirección Xeral da AGASP publicará no taboleiro de anuncios e na súa paxina web http://agasp.xunta.es a resolución en que se declarará aprobada a relación provisional de admitidos/as e excluídos/as, indicando a causa ou motivo da exclusión, no prazo máximo dun mes que comezará a contarse desde o día seguinte ao de remate do prazo de presentación de solicitudes.
Os/as aspirantes que figuren na relación provisional como excluídos disporán dun prazo de 10 días naturais contados a partir do día da publicación de tal resolución, co fin de emendar, de ser o caso, as deficiencias que motivaron a súa exclusión, todo isto de conformidade co previsto no artigo 71 da Lei 30/1992, do 26 de novembro, de réxime xurídico das administracións públicas e do procedemento administrativo común.
Transcorrido o prazo sinalado anteriormente e emendadas as deficiencias detectadas, a AGASP publicará no taboleiro de anuncios e na súa páxina web http://agasp.xunta.es a resolución na cal se declarara aprobada a relación definitiva de admitidos/as e excluídos/as no curso e acordarase a apertura dun prazo de 5 días hábiles en que os/as alumnos/as admitidos/as poderán aboar o prezo privado fixado para participar neste curso de formación.
De conformidade co disposto na orde reguladora dos prezos privados da AGASP (DOG nº 67, do 12 de abril de 2010), o prezo privado ascende á contía de 160 euros. Este importe ingresarase na conta corrente número 2080-0031-30-0040019194 que a AGASP ten aberta en Caixanova, sucursal da Estrada, facendo constar no ingreso o nome, os apelidos e o DNI/NIE do/a solicitante admitido/a no curso. A falta de xustificación do pagamento íntegro do prezo privado dentro do prazo establecido determinará a exclusión do/a aspirante, sen que sexa posible emendar tal deficiencia nun momento posterior.
4. Desenvolvemento da actividade.
Lugar: sede da Academia Galega de Seguridade Pública.
Horario.
Establécense dúas quendas independentes de realización, de mañá e de tarde. O horario da quenda de mañá será das 9.30 ás 14.30 horas e o horario da quenda de tarde será das 16.00 ás 21.00 horas.
Datas: do 14 ao 18 de xuño de 2010.
Certificado de aproveitamento.
Ao remate do curso entregaráselles un certificado de aproveitamento a aquelas persoas que acrediten a súa participación continuada nel e superen as probas que se determinen, de ser o caso.
5. Dereitos e deberes do alumnado participante.
O alumnado da AGASP, durante o seu período de permanencia nas súas instalacións, rexerase polo regulamento de réxime interior desta, publicado na Orde do 4 de febreiro de 2009, da Consellería de Presidencia, Administracións Públicas e Xustiza (DOG nº 30, do 12 de febreiro).
6. Modificacións e incidencias.
A Academia Galega de Seguridade Pública poderá modificar o desenvolvemento normal da actividade para adaptala ás necesidades da Administración e ás continxencias que poidan xurdir.
A Estrada, 28 de abril de 2010.
José Carlos García Bouzas
Director xeral da Academia Galega
de Seguridade Pública
Ver referencia pdf "08400D010P050.PDF"
