De conformidade co disposto no artigo 14 da Resolución do 21 de outubro de 2009 pola que se establecen as bases reguladoras para a concesión, en réxime de concorrencia competitiva, das subvencións e axudas a proxectos de aforro e eficiencia enerxética correspondentes ao exercicio 2009 e ao abeiro do convenio subscrito entre o Instituto para a Diversificación e Aforro da Enerxía (IDAE) e o Instituto Enerxético de Galicia (Inega) o día 3 de xullo de 2009, o Inega publicará a proposta de resolución provisional de solicitudes puntuadas no prazo máximo de catro meses, desde a data de finalización do período de presentación das solicitudes.

No caso de axudas cofinanciadas por fondos comunitarios, o beneficiario estará suxeito ás normas de información e publicidade que establece o Regulamento (CE) 1828/2006 da Comisión, do 8 de decembro de 2006, que fixa normas de desenvolvemento para o Regulamento (CE) 1083/2006 do Consello, do 11 de xullo de 2006, polo que se establecen as disposicións xerais relativas ao Fondo de Desenvolvemento Rexional, ao Fondo Social Europeo e ao Fondo de Cohesión.

Elaborada pola comisión de valoración a proposta de resolución provisional de solicitudes puntuadas referente ás axudas de proxectos de aforro e eficiencia enerxética, cabe darlle publicidade, de conformidade co disposto no art.º 24 da Lei 9/2007, do 13 de xuño, de subvencións de Galicia.

En virtude do exposto anteriormente,

RESOLVO:

Primeiro.-Publicar a proposta de resolución provisional de solicitudes con dereito a subvención, referente ás axudas de proxectos de aforro e eficiencia enerxética, que figura como anexo desta resolución.

Segundo.-Esta liña de axudas está cofinanciada polo Fondo Europeo de Desenvolvemento Rexional nun 19%, no marco do Programa operativo Feder Galicia 2007-2013, eixe 4, tema prioritario 40-41; un 66% en virtude do convenio marco de colaboración 2008-2012, subscrito entre o IDAE e o Inega; e un 15% con fondos propios do Inega.

A concesión destas axudas supón a súa aceptación a ser incluído na lista pública prevista no artigo 7.2º d) do Regulamento (CE) 1828/2006 da Comisión, do 8 de decembro de 2006.

Así mesmo, como beneficiario dunha axuda cofinanciada, deberá cumprir as obrigas de información e publicidade comunitaria establecidos nos artigos 8 e 9 do Regulamento (CE) 1828/2006 da Comisión, do 8 de decembro de 2006, e no artigo 1 do Regulamento (CE) 846/2009 da Comisión, do 1 de setembro de 2009.

Terceiro.-De conformidade co artigo 12 puntos 3º e 4º das bases da convocatoria, e sen prexuízo de que se incrementen os fondos dispoñibles nas liñas de axudas correspondentes, as solicitudes puntuadas que non consten na proposta de resolución anexa non terán dereito a subvención e quedarán en reserva.

Cuarto.-Esta publicación ten efectos de notificación do procedemento, de acordo cos artigos 59.6º e 60 da Lei 30/1992, do 26 de novembro.

Quinto.-Os interesados poderán formular alegacións, ante o Instituto Enerxético de Galicia, no prazo de dez días hábiles contados desde o día seguinte ao da publicación desta resolución no Diario Oficial de Galicia.

Santiago de Compostela, 9 de abril de 2010.

Eliseo Diéguez García

Director do Instituto Enerxético de Galicia

Ver referencia pdf "07800D010P038.PDF"

Ver referencia pdf "07800D011P045.PDF"