Dentro do plan de actividades da Escola Galega de Administración Pública para o ano 2010 e de acordo coas funcións atribuídas pola Lei 4/1987, do 27 de maio, de creación da Escola, e pola Lei 10/1989, do 10 de xullo, de modificación da anterior, convócanse as xornadas Paisaxe con cidade ao fondo. Cultura, patrimonio e administración conforme as seguintes bases:
1. Obxectivos.
O obxectivo destas xornadas é reflexionar e debater arredor das sinerxias que xorden na administración, o patrimonio cultural e o seu aproveitamento dentro dun marco tan significativo para Galicia como é a cidade histórica. Abordarase desde as perspectivas urbanística, patrimonial, arquitectónica e histórico-artística.
2. Contidos.
Serán tratados, entre outros, os seguintes temas:
1. Santiago de Compostela, a fin do Camiño.
2. Memoria e patrimonio. A súa permanencia como reclamo turístico.
3. Iconografía urbana. A imaxe da cidade histórica en Galicia a través da plástica do século XX.
4. A Real Fundación de Toledo.
5. Urbanismo, ordenación do territorio e patrimonio cultural.
6. A cidade histórica no marco xurídico galego.
7. Cara a unha nova lexislación sobre patrimonio.
8. Rutas, fortalezas e cidades. O singular caso do Marrocos.
9. A lexitimidade dun encontro. A definición dunha identidade visual para a cidade histórica.
10. Permanencia e renovación urbanas. O caso de Santiago de Compostela.
11. Diálogos urbanos entre a historia e a modernidade.
12. A nova arquitectura na paisaxe urbana da cidade histórica galega.
13. A igrexa e a configuración do seu novo patrimonio arquitectónico.
14. Cáceres. Un proxecto de capitalidade cultural para o 2016.
15. A Torre de Hércules. Un expediente para a súa declaración como Patrimonio da Humanidade.
16. Centro histórico e sustentabilidade.
17. Patrimonio, paisaxe e sustentabilidade.
3. Destinatarios.
Persoal das diferentes administracións públicas, administración municipal e autonómica, turismo, axentes vinculados co turismo, historiadores da arte, arquitectos e xestores do patrimonio e interesados en xeral.
4. Desenvolvemento.
Lugar: Escola Galega de Administración Pública (EGAP), rúa de Madrid, 2-4, Santiago de Compostela.
Datas: 13, 21 e 28 de abril; 5, 11 e 19 de maio.
Horario: de tarde.
Duración: 3 horas lectivas por xornada, agás a do día 13 de abril que será de 4 horas lectivas.
5. Número de prazas.
Limitado pola capacidade do local.
6. Solicitudes.
-Os interesados en asistir a estas xornadas poderanse inscribir nunha xornada en concreto, en varias ou en todas elas marcando a opción que desexen na folla de inscrición.
-Tramitación de solicitudes: as solicitudes irán dirixidas ao director da Escola Galega de Administración Pública (polígono das Fontiñas, rúa de Madrid, 2-4, 15707, Santiago de Compostela), segundo o modelo que figura como anexo a esta convocatoria, e serán presentadas no rexistro xeral da EGAP, ou ben de calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Serán admitidas inscricións por medio de fax enviado ao número 981 54 63 30 ou por correo electrónico dirixido ao enderezo novas.egap@xunta.es
-Inscricións fóra de prazo: só serán admitidas, de quedaren prazas libres, coa condición de que cumpran os requisitos xerais antes indicados.
-As persoas solicitantes poderán obter a confirmación da súa admisión chamando por teléfono, de 8.30 a 14.30 horas, aos seguintes números: 981 54 62 41-881 99 70 14.
7. Prazo.
O prazo de presentación de solicitudes finalizará:
-O día 9 de abril, para a xornada do 13 de abril.
-O día 19 de abril, para a xornada do 21 de abril.
-O día 26 de abril, para a xornada do 28 de abril.
-O día 3 de maio, para a xornada do 5 de maio.
-O día 7 de maio, para a xornada do 11 maio.
-O día 14 de maio, para a xornada do 19 de maio.
8. Modificacións.
A EGAP reserva para si a facultade de interpretar e de resolver as incidencias que poidan xurdir no desenvolvemento destas xornadas, así como a facultade de cancelalas se o escaso número de solicitudes non xustificar a súa realización.
9. Certificado de asistencia.
Será entregado un certificado de asistencia, ao final de cada xornada, a aquelas persoas inscritas que participasen asiduamente, e sempre que a súa asistencia sexa igual ou superior ao 85% das horas lectivas programadas. Neste documento aparecerán de forma expresa a natureza da actividade e a data de realización.
Santiago de Compostela, 25 de marzo de 2010.
Pablo Figueroa Dorrego
Director da Escola Galega de Administración Pública
Ver referencia pdf "06100D014P188.PDF"