Dentro do plan de actividades da Escola Galega de Administración Pública para o ano 2010 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócase, en colaboración coa Asociación Profesional de Letrados da Xunta de Galicia, un congreso sobre Unha visión xurídica do Camiño de Santiago, conforme ás seguintes bases:.

Primeira.-Obxectivos.

Tratarase dun congreso que analizará a situación da normativa de protección dos Camiños na nosa comunidade autónoma e da súa necesaria reforma, analizará os problemas contenciosos e penais derivados do camiño e estudaranse todos os problemas de xestión desde un punto de vista xurídico, de aí que poida destinarse a todos os xestores pero tamén a órganos de fiscalización xurídica e resolución de problemas de índole xurisdicional (avogados do Estado, letrados de todas as comunidades autónomas, da Seguridade Social, asesores xurídicos municipais, etc.).

Segunda.-Contidos.

Serán tratados, entre outros, os seguintes temas:.

-A normativa do Camiño de Santiago. A década dos 90 como período de revitalización xurídica do Camiño de Santiago.

-A protección do Camiño de Santiago e do peregrino ao longo da historia.

-A protección xurídica do Camiño de Santiago.

-A acción administrativa de fomento do Camiño de Santiago.

-A problemática xurídico-contenciosa vinculada ao Camiño de Santiago.

-A protección europea do Camiño de Santiago.

-Os delitos no Camiño de Santiago.

-A protección xurídica do peregrino.

-A Administración creada ao servizo do Camiño.

-A regulación do sector turístico en Galicia.

-Estudo do preciso desenvolvemento normativo para a protección do Camiño de Santiago.

Terceira.-Destinatarios.

Representantes de todas as áreas da administración autonómica e das súas entidades dependentes vinculadas á xestión de materias relacionadas co Camiño de Santiago e representantes doutras administracións públicas (Estado, comunidades autónomas e entidades locais) implicadas na execución do Xacobeo 2010, alumnos universitarios das titulacións relacionadas coas materias a tratar no congreso, funcionarios de todas as administracións públicas e interesados en xeral.

Cuarta.-Desenvolvemento.

Lugar: Escola Galega de Administración Pública (EGAP), r/ Madrid, 2-4, Santiago de Compostela.

Data: 14, 15 e 16 de abril.

Duración: 20 horas lectivas.

Quinta.-Número de prazas.

Limitado pola capacidade do local.

Sexta.-Solicitudes.

-Tramitación de solicitudes: as solicitudes irán dirixidas ao director da Escola Galega de Administración Pública (Polígono das Fontiñas, r/ Madrid, 2-4, CP 15707, Santiago de Compostela), segundo o modelo que figura como anexo a esta convocatoria, e serán presentadas no rexistro xeral da EGAP, ou ben de calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Serán admitidas inscricións por medio de fax enviado ao número 981 54 63 30 ou por correo electrónico dirixido ao enderezo novas.egap@xunta.es.

-Inscricións fóra de prazo: só serán admitidas, de quedar prazas libres, coa condición de que cumpran os requisitos xerais antes indicados.

As persoas solicitantes poderán obter a confirmación da súa admisión se chaman por teléfono, das 08.30 ás 14.30 horas, aos seguintes números: 981 54 62 41 - 881 99 70 14.

Sétima.-Prazo.

O prazo de presentación de solicitudes finalizará o luns 12 de abril de 2010.

Oitava.-Modificacións.

A EGAP reserva para si a facultade de interpretar e de resolver as incidencias que poidan xurdir no desenvolvemento deste congreso, así como a facultade de cancelalo se o escaso número de solicitudes non xustificase a súa realización.

Novena.-Certificado de asistencia.

Será entregado un certificado de asistencia, ao final do congreso, a aquelas persoas inscritas que participasen asiduamente, e sempre que a súa asistencia sexa igual ou superior ao 85% das horas lectivas programadas. Neste documento aparecerán de forma expresa a natureza da actividade e a data de realización.

Santiago de Compostela, 23 de marzo de 2010.

Pablo Figueroa Dorrego

Director da Escola Galega de Administración Pública

Ver referencia pdf "06100D014P188.PDF"