Pola Orde do 27 de agosto de 2009 (DOG nº 175, do 7 de setembro) publicáronse as bases reguladoras para a concesión de axudas para proxectos ao abeiro dos plans estratéxicos zonais aprobados pola Consellería do Mar aos grupos de acción costeira e procedeuse á convocatoria para o ano 2009.
Na disposición transitoria da dita orde establecíase como data límite para que os grupos de acción costeira remitiran á Consellería do Mar a proposta de resolución definitiva o 6 de novembro de 2009.
Vencida esa data e dado que a maioría dos grupos de acción costeira se atopaban no proceso de selección de xerentes e persoal técnico, e non dispoñían polo tanto de persoal cualificado para realizar a fase de instrución, non puideron presentar as súas propostas, agás o GAC nº 6 Ría de Pontevedra que si o fixo pero con deficiencias na súa tramitación que impediron tela en consideración.
Polo tanto e en virtude da delegación realizada no artigo 15.2º da Orde do 27 de agosto de 2009,
RESOLVO:
Primeiro.-Declarar deserta a convocatoria de 2009.
Segundo.-Os promotores dos proxectos presentados nesta convocatoria que non foron atendidos poderán, se así o desexan, facer manifestación expresa de que se teñan en consideración na convocatoria de 2010 facendo, se é o caso, os axustes ou modificacións que estimen oportunos.
Contra esta resolución, que esgota a vía administrativa, poderá interporse potestativamente recurso de reposición ante a conselleira do Mar no prazo dun mes contado a partir do día seguinte ao da publicación desta resolución no Diario Oficial de Galicia, ou directamente recurso contencioso-administrativo ante o Xulgado do Contencioso-Administrativo de Santiago de Compostela, no prazo de dous meses contados desde a mesma data.
Santiago de Compostela, 16 de decembro de 2009.
Susana Rodríguez Carballo
Directora xeral de Desenvolvemento Pesqueiro