O día 30 de outubro de 2009 produciu efectos o capítulo I da Orde do 21 de outubro de 2009 pola que se convoca concurso de selección dunha entidade aseguradora que ofreza un seguro de indemnización diaria en caso de paralización e perda da produción por condicións climatolóxicas adversas no sector pesqueiro e marisqueiro de Galicia, así como as axudas para a súa subscrición, e abriuse o prazo de 15 días hábiles para que as entidades aseguradoras interesadas poidan presentar as súas ofertas.

Unha vez rematado o plazo de licitación e seleccionada aquela entidade aseguradora que ofreza as mellores condicións, procederase a ditar resolución de adxudicación, publicación da resolución en que se selecciona a entidade aseguradora e sinatura do convenio de colaboración.

Por razóns de cumprimento de prazos ante a proximidade da finalización do exercicio económico corrente, e dado que hai datas establecidas que farán imposible a realización, por parte da entidade aseguradora seleccionada, tanto dos trámites administrativos preceptivos, como dos de difusión, divulgación e promoción do seguro obxecto da orde publicada, é preciso modificar determinados artigos que afectan os prazos de execución así como a dotación orzamentaria que se fará con cargo aos orzamentos xerais da comunidade autónoma para o ano 2010.

Por todo o exposto e facendo uso das facultades que me confire o artigo 34 da Lei 1/1983, do 22 de febreiro, de normas reguladoras da Xunta e da súa Presidencia,

DISPOÑO:

Artigo único.-A modificación dos artigos 3, 13, 17 e 23 da Orde do 21 de outubro de 2009 pola que se convoca concurso de selección dunha entidade aseguradora que ofreza un seguro de indemnización diaria en caso de paralización e perda da produción por condicións climatolóxicas adversas no sector pesqueiro e marisqueiro de Galicia, así como as axudas para a súa subscrición.

1. Modifícase o parágrafo segundo da condición quinta do artigo 3.-Condicións que debe cumprir a entidade aseguradora, que queda redactado como segue:

«O importe correspondente á axuda concedida pola Xunta de Galicia aos tomadores farase efectivo dunha soa vez, de acordo cos termos que se establecen no capítulo II desta orde. A entidade aseguradora informará, para isto, das pólizas subscritas, na forma e tempo que se acorde no convenio de colaboración».

2. Modifícase o artigo 13.-Dotación orzamentaria, quedando a redacción como segue:

«As axudas concederanse con cargo aos créditos previstos na aplicación orzamentaria 14 03 722A 770 0 proxecto 201001020, consignados no proxecto da Lei de orzamentos xerais da Comunidade Autónoma de Galicia para o ano 2010 por importe de 300.000 euros. Esta orde tramítase de acordo co disposto na Orde do 11 de febreiro de 1998, da Consellería de Economía e Facenda, sobre tramitación anticipada de gastos, modificada polas ordes do 27-11-2000 e 25-10-2001, polo que a súa eficacia queda condicionada á existencia de crédito axeitado e suficente nos orzamentos desta consellería para o ano 2010.

O importe consignado na convocatoria poderá ser ampliado en función das dispoñibilidades orzamentarias, sen que iso dea lugar a un novo prazo de presentación de solicitudes, salvo indicación expresa na orde que se publique para o efecto».

3. Modifícase o artigo 17.-Órganos de xestión, quedando a redacción como segue:

«As entidades colaboradoras da Administración comprobarán a situación de cada un dos solicitantes das axudas e asinante do seguro ao abeiro do disposto nesta orde, revisarán as solicitudes no momento da súa presentación e entregarán na Consellería do Mar, no prazo máximo de 20 días desde o seguinte ao da finalización de presentación de solicitudes de axuda á subscrición do seguro sinalado no artigo 15 desta orde, unha relación ordenada dos solicitantes, á que xuntarán os expedientes individuais».

4. Modifícase o artigo 23.-Xustificación e pagamento, quedando a redacción como segue:

«Para proceder ao pagamento, a entidade aseguradora remitirá á Consellería do Mar a listaxe dos tomadores con certificación dos seguros subscritos, importe da prima, pagamentos realizados polos beneficiarios e importe da axuda. Aos anteriores documentos uniranse as correspondentes certificacións de estar ao día no cumprimento das obrigas tributarias co Estado e coa Comunidade Autónoma de Galicia e coa Seguridade Social e de non ter débedas pendentes, por ningún concepto, coa Administración da comunidade autónoma e, se é o caso, sempre que se dea algún dos casos previstos no artigo 11 do Decreto 11/2009, que aproba o regulamento da Lei de subvencións de Galicia, a declaración responsable do solicitante de estar ao día no cumprimento das obrigas tributarias ou fronte á Seguridade Social e de non ter pendente de pagamento ningunha outra débeda coa Administración pública da comunidade autónoma.

A axuda da Consellería do Mar aboarase dunha soa vez á entidade aseguradora e na contía que corresponda segundo os seguros asinados, mediante transferencia».

Disposición derradeira

Única.-Esta orde producirá efectos a partir do día seguinte ao da publicación no Diario Oficial de Galicia.

Santiago de Compostela, 23 de decembro de 2009.

Rosa Mª Quintana Carballo

Conselleira do Mar