Por Resolución do 25 de novembro de 2009, da Secretaría Xeral de Medios, convócase o premio institucional Chano Piñeiro no ámbito da promoción do sector audiovisual correspondente ao ano 2009 e apróbanse as súas bases.
Por resolución da mesma secretaría, do 4 decembro de 2009, designáronse os vogais do xurado encargado do outorgamento do dito premio, regulado na base cuarta da Resolución do 25 de novembro de 2009.
O 14 de decembro, logo de convocatoria, reúnese o xurado do premio para analizar e valorar as propostas de candidatos, así como para outorgar o premio.
A base quinta, punto terceiro, da mencionada Resolución do 25 de novembro de 2009, dispón que a resolución pola que se outorgue o galardón publicarase inmediatamente no Diario Oficial de Galicia e notificarase oportunamente. Na súa virtude,
RESOLVO:
Dar publicidade ao acordo do xurado designado para outorgar o premio Chano Piñeiro 2009, de acordo co seguinte teor:
Reunido o día 14 de decembro de 2009 o xurado designado para outorgar o premio institucional Chano Piñeiro no ámbito da promoción do sector audiovisual correspondente ao ano 2009, unha vez analizadas e valoradas as propostas de candidatos presentadas, acorda por unanimidade:
Primeiro.-Conceder ex aequo o premio Chano Piñeiro na súa cuarta edición correspondente ao ano 2009:
Á actriz María Bouzas, pola súa dilatada e versátil traxectoria no teatro, a televisión e o cine galegos ao longo de vinte anos, contribuíndo igualmente á integración da muller no oficio da dramatización, ao tempo que se convertía nunha referencia para o obxectivo dun audiovisual propio.
Ao director e realizador Xavier Villaverde de longa traxectoria profesional comezada nos albores do cine galego dos anos setenta ata o tempo presente, para experimentar con fortuna noutros soportes e formatos, sendo o único dos directores en activo desde que hai vinte anos estreou a súa primeira longametraxe.
Segundo.-Conceder, con carácter honorífico, o premio Chano Piñeiro a dous persoeiros xa ausentes entre nós pero sempre na memoria de todos os galegos vinculados co medio audiovisual.
A Carlos Velo Cobelas con motivo do centenario do seu nacemento por ter sido un referente no desenvolvemento histórico do xénero documental, ponte entre a cultura galega e mexicana, en máis de medio século de traxectoria profesional.
A José Luis Cabo Villaverde, finado no ano presente e vinculado a múltiples facetas das artes visuais, que ademais fora director do Centro Galego de Artes da Imaxe, institución que axudou a prestixiar.
Santiago de Compostela, 16 de decembro de 2009.
Alfonso Cabaleiro Durán
Secretario xeral de Medios