Mediante o Real decreto 2397/1996, do 22 de novembro, BOE do 17 de decembro, traspasáronselle á Comunidade Autónoma de Galicia as funcións e os servizos que, dentro do territorio de Galicia, desempeñaba a Administración do Estado sobre o persoal ao servizo da Administración de xustiza.

Dentro do contexto de crise económica en que nos atopamos, a Administración de xustiza en Galicia, como no conxunto do Estado, está experimentado un aumento cuantitativo de carga de traballo por mor da maior litixiosidade. Esta situación focalízase máis intensamente en determinadas unidades -que requiren medidas singulares de apoio ou reforzo-, pero afecta en xeral o conxunto da organización xudicial.

A Xunta de Galicia considera que superar esta situación requirirá do esforzo de todos os sectores que participan na xustiza. Neste senso, hai que salientar a importancia do labor dos empregados públicos no desenvolvemento da actividade cotiá de xulgados, tribunais, fiscalías, instituto de medicina legal, rexistros civís, etc. A súa dedicación e eficiencia son elementos fundamentais para dar resposta ás situacións de conxestión xudicial, situacións en que, ademais, as súas condicións de traballo empeoran. Sen dúbida, a adopción de medidas que incorporen unhas condicións de traballo e salariais máis satisfactorias constitúe un estímulo para afrontar esta situación e para favorecer a implicación no desenvolvemento do seu labor.

Conscientes da realidade económica e das posibilidades orzamentarias, a Xunta de Galicia e as organizacións sindicais presentes na Mesa Sectorial de Negociación da Administración de Xustiza acordaron, con data do 30 de xullo de 2009, o establecemento dun programa de actuación para fomentar a implicación dos funcionarios dos corpos que integran o colectivo do persoal ao servizo da Administración de xustiza.

O título VI do libro VI da Lei orgánica do poder xudicial ao regular o réxime retributivo do dito persoal proporciona o marco normativo para instrumentar o mencionado programa de actuación. Efectivamente, entre os conceptos retributivos que este título regula figura o complemento de produtividade, que se sitúa baixo o ámbito de competencia das comunidades autónomas con competencias asumidas. E, concretamente, o artigo 519.4º da Lei orgánica 6/1985, do 1 de xullo, do poder xudicial -na redacción dada pola Lei orgánica 19/2003- establece: Correspóndelles ao Ministerio de Xustiza ou ao órgano competente da comunidade autónoma, nos seus respectivos ámbitos, a concreción individual das contías do complemento de produtividade e a determinación dos funcionarios con dereito á súa percepción, de acordo cos criterios de distribución que se establezan para os diferentes programas e obxectivos. As citadas autoridades establecerán fórmulas de participación dos representantes sindicais na súa

determinación concreta e o control formal da asignación.

Tendo en conta o anterior, a Consellería de Presidencia, Administracións Públicas e Xustiza, para facer efectivo o dito Acordo do 30 de xullo de 2009,

DISPÓN:

Artigo 1º.-Obxecto.

O obxecto desta orde é establecer un programa de actuación ao abeiro do artigo 519.4º da Lei orgánica 6/1985, do poder xudicial, e regular o complemento de produtividade do persoal funcionario ao servizo da Administración de xustiza.

Artigo 2º.-Ámbito de aplicación.

O ámbito de aplicación desta orde comprende o persoal funcionario dos corpos de médicos forenses, xestión procesual e administrativa, tramitación procesual e administrativa e auxilio xudicial en servizo activo e que ocupe postos de traballo incluídos nos cadros de persoal dos centros de destino da Administración de xustiza en Galicia.

Así mesmo, comprende o persoal interino que desempeñe os ditos postos e os que realicen funcións de reforzo nos xulgados, tribunais, fiscalías e demais unidades da Administración de xustiza.

Artigo 3º.-Obxectivo e aprobación do programa de actuación.

Co obxectivo de aumentar a produtividade da Administración de xustiza para facer fronte á maior litixiosidade que deriva dun contexto de crise económica, apróbase un programa de actuación dirixido a estimular a implicación dos empregados públicos para responder á actual situación de sobrecarga de traballo sobre a organización xudicial.

Artigo 4º.-Complemento de produtividade.

Mensualmente asignarase unha cantidade de 10 euros por funcionario en concepto de complemento de produtividade, consonte o previsto no artigo 519.4 da Lei orgánica do poder xudicial, para o cumprimento do obxectivo perseguido polo programa de actuación recollido no artigo anterior.

Artigo 5º.-Dereito á percepción do complemento de produtividade.

1. Con carácter mensual, procederase ao pagamento do complemento de produtividade a todos os funcionarios comprendidos dentro do ámbito de aplicación desta orde.

2. Non se considerarán períodos de desempeño do posto de traballo, para os efectos do complemento de produtividade, as ausencias regulamentarias motivadas pola concesión de excedencias, comisións de servizos noutras administracións públicas, licenzas por enfermidade por tempo superior a seis meses, permisos ou licenzas sen dereito a soldo, licenzas extraordinarias ou situacións análogas.

3. Se o período de desempeño do posto de traballo fose inferior ao mes ou o funcionario realizase unha xornada reducida con minoración de salario, a contía do complemento de produtividade será proporcional ao período ou á xornada efectivamente desempeñados.

Disposicións adicionais

Primeira.-Financiamento do programa de actuación.

O programa de actuación que se aproba por medio desta orde financiarase durante o 2009 dentro dos límites das dispoñibilidades orzamentarias existentes na aplicación orzamentaria 06.05.131B.150.00 para produtividade do persoal ao servizo da Administración de xustiza.

Segunda.-Comisión paritaria de seguimento do programa de actuación.

1. Para o seguimento do programa e o control da súa aplicación constituirase unha comisión paritaria formada por un membro de cada organización sindical con presenza na Mesa Sectorial de Negociación da Administración de Xustiza e un número igual de representantes da Administración. Cada un dos membros poderá ter o seu correspondente substituto.

2. Ademais das de seguimento do programa e control da súa aplicación, a comisión paritaria asumirá funcións de información e asesoramento.

Disposicións derradeiras

Primeira.-Efectos económicos.

1. O complemento de produtividade establecido no artigo 4 desta orde terá efectos económicos desde o 1 de xullo de 2009. Con esta finalidade, as habilitacións elaborarán unha nómina, en concepto de atrasos, en que liquidarán as cantidades que lles corresponda percibir aos funcionarios comprendidos dentro do ámbito de aplicación desta norma con dereito á percepción do complemento entre o 1 de xullo de 2009 e a data de entrada en vigor prevista na disposición seguinte.

2. A percepción do complemento de produtividade manterase mentres non se produzan os procesos de integración dos funcionarios con dereito á súa percepción nas relacións de postos de traballo aprobadas conforme o disposto na Lei orgánica 19/2003, do 23 de decembro.

Segunda.-Entrada en vigor.

Sen prexuízo do establecido na disposición derradeira anterior, esta orde entrará en vigor ao día seguinte da súa publicación no Diario Oficial de Galicia.

Santiago de Compostela, 2 de decembro de 2009.

Alfonso Rueda Valenzuela

Conselleiro de Presidencia, Administracións Públicas e Xustiza