A Orde do 17 de abril de 2009, pola que se establecen as bases reguladoras para a concesión en réxime de concorrencia competitiva das axudas á paralización definitiva dos buques pesqueiros financiadas co Fondo Europeo de Pesca e se convocan para o exercicio 2009 (DOG nº 78, do 23 de abril) establece no seu artigo 4 que os importes fixados en cada convocatoria se poderá ampliar sen que iso dea lugar a un novo prazo de presentación de solicitudes.
O contexto da situación económica do sector pesqueiro, a demanda de solicitudes para acollerse ás devanditas axudas e a existencia de remanente de fondos existentes, xustifican incrementar o crédito da devandita orde de feito que permita achegar as axudas a un maior número de beneficiarios.
Considerando todo o dito anteriormente é polo que cómpre ampliar o importe da contía máxima das axudas que poderán ser concedidas ao abeiro da Orde do 17 de abril de 2009 sen que iso dea lugar a un novo prazo de presentación de solicitudes.
Por todo o exposto e no uso das facultades que me foron conferidas,
Dispoño:
Artigo único.-Amplíase o importe do crédito máximo de concesión das axudas ao abeiro da Orde do 17 de abril de 2009 en 321.464 euros, con cargo á aplicación 50.02.723A.770.1 dos orzamentos xerais da Comunidade Autónoma de Galicia para o ano 2009.
Disposición derradeira
Única.-Esta orde producirá efectos a partir do día seguinte ao da súa publicación no Diario Oficial de Galicia.
Santiago de Compostela, 17 de novembro de 2009.
Rosa María Quintana Carballo
Conselleira do Mar