A Orde do 6 de xullo de 2009 (DOG nº 141, do 21 de xullo) estableceu axudas para o fomento de actuacións destinadas á protección e benestar dos animais domésticos realizadas por asociacións protectoras de animais domésticos.
O número 4º do artigo 12 da dita orde establece que, para o pagamento da cantidade adxudicada a cada asociación beneficiaria, a documentación xustificativa dos gastos de atención sanitaria e mantemento nutricional estipulados no artigo 5 da orde deberá ser presentada no período abranguido entre o 16 e o 30 de novembro de 2009 en calquera dos lugares mencionados no artigo 6.5º. Debido á demora da xestión destas axudas é imposible cumprir esta data, polo que é necesario ampliar o dito prazo. Ao mesmo tempo, o dito prazo está limitado pola Orde do 6 de novembro de 2009 pola que se regulan as operacións de cerramento do exercicio de 2009, que condiciona esta ampliación.
En consecuencia, de conformidade co disposto no artigo 30.1º.3 do Estatuto de autonomía de Galicia, e no uso das facultades que me confire a Lei 9/2007, do 13 de xuño, de subvencións de Galicia, e a Lei 1/1983, do 22 de febreiro, reguladora da Xunta e da súa Presidencia,
DISPOÑO:
Artigo único.
Primeiro.-O prazo para a xustificación dos gastos de atención sanitaria e mantemento nutricional que consta no número 4º do artigo 12 da Orde do 6 de xullo de 2009, amplíase ata o 4 de decembro de 2009.
Segundo.-Esta modificación non afecta o prazo que se establece para a presentación de solicitudes de axuda na devandita Orde do 6 de xullo de 2009.
Disposición derradeira
Esta orde entrará en vigor o mesmo día da súa publicación no Diario Oficial de Galicia.
Santiago de Compostela, 20 de novembro de 2009.
Samuel Jesús Juárez Casado
Conselleiro do Medio Rural