Dentro do plan de actividades da Escola Galega de Administración Pública para o ano 2009, e de acordo coas funcións atribuídas pola Lei 4/1987, do 27 de maio, de creación da Escola, e pola Lei 10/1989, do 10 de xullo, de modificación da anterior, convócanse as Xornadas sobre Administración cidadá: interese histórico e a súa proxección no dereito actual, conforme as seguintes bases

Primeira.-Obxectivos.

Estas xornadas queren mostrar como a Administración está presente na vida cidadá desde a antiga Roma ata hoxe en día. Non se trata soamente de realizar un itinerario histórico pola devandita Administración, polo que faremos un percorrido xurídico desde os tempos de Roma ata a súa proxección no dereito moderno. Poñendo en relación a experiencia xurídica romana co dereito público actual, veremos como moitos conceptos fundamentais do dereito público medieval e moderno teñen a súa orixe en formas institucionais e principios da experiencia romana; non obstante, aínda que no dereito público actual encontramos termos, conceptos, formas que poden parecer iguais ou similares a aquelas da experiencia romana, non se debe esquecer que teñen inevitablemente asumido un valor distinto no singular contexto histórico que as xerou. Mostraremos como o oficio de avogado se encontra entre o cidadán e a Administración pública, e falaremos da carreira administrativa na antiga Roma, nun intento de mostrar

as similitudes e diferenzas coa agora vixente. O dereito fiscal, cos seus instrumentos de política financeira, tamén estará presente, así como o modelo romano de cidade e a comparación co urbanismo actual. Co firme propósito de mostrar como incidía na cidadanía a Administración romana, presentamos estas xornadas, con afán divulgativo, dos comezos xurídicos dunha Administración que se converterá, co paso do tempo, no eixe da vida cidadá.

Segunda.-Contidos.

Serán tratados, entre outros, os seguintes temas:

-A experiencia xurídica romana e o dereito público moderno.

-Dereito fiscal: instrumentos de política financeira e principios de xustiza tributaria.

-O problema da terra e a súa influencia na Constitución de Roma.

-Fundamentos clásicos da democracia moderna.

-A reforma constitucional romana propugnada polos irmáns Graco.

-A Administración territorial da Galicia romana.

-Oficio de avogado: entre o cidadán e a Administración pública.

-A planificación do solo no urbanismo romano e o modelo actual da cidade.

-A carreira administrativa na antiga Roma.

Terceira.-Destinatarios.

Persoal ao servizo da Administración pública galega e interesados en xeral.

Cuarta.-Desenvolvemento.

Lugar: Escola Galega de Administración Pública (EGAP); rúa de Madrid, 2-4, Santiago de Compostela.

Datas: 28, 29 e 30 outubro de 2009.

Duración: 13 horas lectivas.

Horario:

-Días 28 e 29 de outubro: de mañá e tarde.

-Día 30 de outubro: de mañá.

Quinta.-Número de prazas.

Limitado pola capacidade do local.

Sexta.-Solicitudes.

-Tramitación de solicitudes: as solicitudes irán dirixidas ao director da Escola Galega de Administración Pública (polígono das Fontiñas; rúa de Madrid, 2-4, 15707 Santiago de Compostela), segundo o modelo que figura como anexo a esta convocatoria, e serán presentadas no rexistro xeral da EGAP, ou ben de calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Serán admitidas inscricións por medio de fax enviado ao número 981 54 63 30 ou por correo electrónico dirixido ao enderezo novas.egap@xunta.es.

-Inscricións fóra de prazo: só serán admitidas, de quedaren prazas libres, coa condición de que cumpran os requisitos xerais antes indicados.

As persoas solicitantes poderán obter a confirmación da súa admisión se chaman por teléfono, das 8.30 ás 14.30 horas, aos seguintes números: 981 54 62 41-881 99 70 14.

Séptima.-Prazo.

O prazo de presentación de solicitudes finalizará o luns 26 de outubro de 2009.

Oitava.-Modificacións.

A EGAP reserva para si a facultade de interpretar e de resolver as incidencias que poidan xurdir no desenvolvemento das xornadas, así como a facultade de cancelalas se o escaso número de solicitudes non xustificase a súa realización.

Novena.-Certificado de asistencia.

Entregaráselles un certificado de asistencia, ao final das xornadas, a aquelas persoas inscritas que participasen asiduamente, e sempre que a súa asistencia sexa igual ou superior ao 85% das horas lectivas programadas. Neste documento aparecerán de forma expresa a natureza da actividade e a data de realización.

Santiago de Compostela, 15 de outubro de 2009.

Pablo Figueroa Dorrego

Director da Escola Galega de Administración Pública

Ver referencia pdf "20400D011P039.PDF"