Tendo en conta o acordo de colaboración subscrito o 26 de marzo de 2009 entre o Consello Consultivo de Galicia e a Escola Galega de Administración Pública, convócase o curso sobre A función de control da administración consultiva: O Consello Consultivo de Galicia, conforme as seguintes bases:

Primeira.-Destinatarios.

Esta actividade formativa está destinada ao persoal dos grupos A1, A2 e C1 ao servizo da Administración xeral da Xunta de Galicia, dos seus organismos públicos e demais entes dela dependentes, e a súa selección faraa o Consello Consultivo de Galicia respectando en todo caso os criterios selectivos sinalados con carácter xeral na Resolución do 4 de xaneiro de 2008 (DOG nº 7, do 10 de xaneiro).

Segunda.-Obxectivos.

O curso pretende, por unha banda, constituír unha canle de divulgación da doutrina sentada polo Consello Consultivo nas materias obxecto da súa competencia e, por outra, permitir a apertura dun foro de debate sobre elas, logo de transcorridos trece anos desde a súa creación e tendo en conta a experiencia acumulada ao longo deste tempo no seu labor de asesoramento e control preventivo da actividade administrativa autonómica.

Terceira.-Programa.

O curso estrutúrase nos seguintes módulos:

-Módulo I. A Administración consultiva da Comunidade Autónoma de Galicia: o Consello Consultivo de Galicia.

-Módulo II. O control da potestade regulamentaria. O regulamento. Relacións entre lei e regulamento. Titularidade da potestade regulamentaria. O principio de reserva de lei.

-Módulo III. Procedemento de elaboración de disposicións de carácter xeral. Normativa reguladora.

-Módulo IV. A responsabilidade patrimonial da Administración pública.

-Módulo V. A contratación administrativa: modificación e resolución dos contratos.

-Módulo VI. A revisión de oficio dos actos e disposicións administrativas de carácter xeral.

Cuarta.-Desenvolvemento.

Datas: 2, 3, 4, 5, 9 e 10 de novembro de 2009.

Horario previsto: das 17.00 ás 20.00 horas.

O curso convocado desenvolverase na Escola Galega de Administración Pública (EGAP), situada na rúa Madrid, 2-4, Polígono das Fontiñas, en Santiago de Compostela, agás a primeira sesión que terá lugar tras o acto inaugural o día 2 de novembro na sede do Consello Consultivo de Galicia sita na rúa Algalia de Abaixo, nº 24, Santiago de Compostela.

Quinta.-Prazas.

40.

Sexta.-Prazo de inscrición e presentación de instancias.

O prazo de presentación de solicitudes finalizará o venres 16 de outubro de 2009.

O persoal que desexe participar no curso que se convoca nesta resolución deberá cubrir a solicitude de inscrición que se pode atopar no portal web do Consello Consultivo de Galicia no seguinte enderezo: http://ccgalicia.es/pages/novas.html.

As solicitudes irán dirixidas á Secretaría Xeral do Consello Consultivo de Galicia (rúa Algalia de Abaixo, nº 24, CP 15704 Santiago de Compostela (A Coruña), e serán presentadas no rexistro do Consello Consultivo, ou ben de calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Serán admitidas inscricións por medio de fax enviado ao número 981 58 33 15 ou por correo electrónico dirixido ao enderezo secretaria@ccgalicia.es.

Para máis información respecto a aspectos organizativos ou docentes do curso poden chamar ao teléfono 981 55 21 10.

Sétima.-Selección.

Os criterios selectivos que serán empregados son os sinalados con carácter xeral na resolución da Escola Galega de Administración Pública do 4 de xaneiro de 2008 (DOG nº 7, do 10 de xaneiro). A selección dos participantes será realizada polo Consello Consultivo de Galicia.

O Consello Consultivo de Galicia publicará na súa páxina web a relación de admitidos no curso, e comunicará, así mesmo, ás persoas solicitantes a confirmación da súa admisión no curso ao enderezo de correo electrónico que figure na solicitude de inscrición.

Oitava.-Modificacións.

O Consello Consultivo de Galicia conxuntamente coa EGAP reservan para si a facultade de interpretar e de resolver as incidencias que puidesen xurdir no desenvolvemento do curso, así como de cancelalo, se o escaso número de solicitudes non xustificase a súa realización.

Novena.-Certificados.

A actividade formativa terá un recoñecemento oficial por parte da EGAP, que se plasmará no correspondente documento xustificativo da súa realización, a aquelas persoas inscritas que participasen con regularidade e dedicación no desevolvemento do curso, e sempre que a súa asistencia sexa igual ou superior ao 85% das horas lectivas programadas. Neste documento aparecerán de forma expresa a natureza da actividade e a data de realización.

Santiago de Compostela, 30 de setembro de 2009.

Mª Teresa Conde-Pumpido Tourón

Presidenta do Consello Consultivo de Galicia