De conformidade coa disposición transitoria segunda do Decreto 245/2009, do 30 de abril (DOG do 1 de maio) e coa disposición adicional cuarta da Orde do 25 de febreiro de 2009, pola que se establecen as normas de pesca nas augas continentais da Comunidade Autónoma de Galicia durante a temporada 2009, na que se faculta o delegado provincial da Consellería de Medio Ambiente e Desenvolvemento Sostible en Pontevedra para ditar cantas normas sexan necesarias para a regulación da pesca da lamprea no río Ulla e, co obxecto de que se realice un aproveitamento ordenado desta pesca, establécese un réxime especial de pesca da antedita especie para o vindeiro ano 2010 nos tramos e coas limitacións que a continuación se indican, ás cales se deberán ater as persoas autorizadas como titulares, así como as autorizadas para pescar nelas:
-Nas pesqueiras das Areas e As Vellas deberán deixar libre o canal central do río e, non se poderá traballar na denominada vea.
-O período de pesca será: nas pesqueiras das Areas (Herbón), do día 4 de xaneiro ao 30 de marzo; e no tramo comprendido desde a pesqueira As Vellas (Herbón) ata a pesqueira da Trapa (Herbón) ambas incluídas, do 1 de febreiro ao 30 de abril; e no tramo comprendido desde as pesqueiras A Caseta e Furado (Carcacía) ata a pesqueira Lampreeiro, no lugar das Pesqueiras (Reis) todas incluídas, do 15 de febreiro ata o 14 de maio.
-A pesca só poderá practicarse desde as pesqueiras tradicionais, detalladas no anexo, debendo empregar redes que non causen dano a outras especies piscícolas.
-As redes só poderán estar colocadas desde as 20.00 ata as 8.00 horas.
-Prohíbese a realización dos labores de pesca, debendo levantarse as redes das pesqueiras, desde as 8.00 horas dos sábados ata as 20.00 dos luns.
-Toda persoa que traballe nas pesqueiras deberá estar en posesión da correspondente licenza de pesca e do permiso de 4ª categoría para cada día e pesqueira, documentos que deberán levar consigo xunto co DNI durante a práctica desta actividade.
-Serán devoltos ás augas ou entregadas aos axentes que o soliciten, todos aqueles exemplares piscícolas que non sexan as lampreas capturadas nas pesqueiras.
-En todo momento, deberán colaborar coa gardaría de Conservación da Natureza da Consellería do Medio Rural, seguindo as súas instrucións.
-O mesmo día que remate o réxime especial, procederase a retirar as artes de pesca.
As infraccións contra esta regulación serán sancionadas de conformidade co establecido na Lei 7/1992, do 24 de xullo, de pesca fluvial. Polo uso indebido da pesqueira responderá o seu titular; se nun mesmo posto hai varios titulares responderán conxunta e solidariamente.
Xunto cos permisos entregarase un cuestionario de rexistro de capturas que deberá ser debidamente cuberto e deberá estar sempre á disposición da gardaría de Conservación da Natureza. Unha vez rematada a temporada será entregado no Servizo de Conservación da Natureza.
No caso de que a pesqueira a traballe unha persoa distinta do seu titular, para a obtención dos citados permisos, deberá acreditar no Servizo de Conservación da Natureza estar autorizado polo seu titular.
O Servizo de Conservación da Natureza, por razóns hidrobiolóxicas, de estiaxe ou calquera outra que o faga necesario, poderá modificar o contido desta normativa adoptando medidas axeitadas.
Prazo para presentar as solicitudes:
Co obxecto de adxudicar as pesqueiras para a pesca da lamprea, acordo abrir o prazo para que os titulares das pesqueiras do río Ulla presenten a súa solicitude:
-O dito prazo estará aberto desde a publicación desta resolución ata as 14.00 horas do día 30 de novembro de 2009.
-Coa solicitude deberán presentar copia do DNI e a documentación que acredite a titularidade da pesqueira no Servizo Provincial de Conservación da Natureza, rúa Fernández Ladreda, 43 de Pontevedra.
-A pesqueiras solicitadas serán as que se relacionan no anexo.
Pontevedra, 24 de setembro de 2009.
Gerardo Zugasti Enrique
Xefe territorial de Pontevedra
Ver referencia pdf "19900D008P032.PDF"
