O día 24 de decembro de 2008 publicouse no Diario Oficial de Galicia a Orde do 16 de decembro de 2008 pola que se establecían as bases reguladoras e se convocaban para 2008 e 2009 as axudas aos traballadores residentes en Galicia para a contratación dun seguro de pagamentos protexidos.
Segundo o previsto no artigo 19º da orde, as axudas reguladas nela financiaríanse con cargo á aplicación orzamentaria 0705.621A.480.0 cun crédito plurianual por un importe de 500.000 euros para o exercicio 2008 e de 9.500.000 euros para o exercicio 2009. Actualmente a partida orzamentaria denomínase 4205.621A.480.0.
Tendo en conta que o número de solicitudes de axudas presentado resulta moi inferior ás previsións iniciais, procede modificar o dito artigo 19º co fin de adaptar o importe orzado ás previsións actualizadas das axudas a pagar ata o final do ano 2009, permitindo, ademais, a utilización dos fondos liberados para financiar determinadas actuacións do Plan de medidas de actuación urxente fronte á crise económica.
Por todo o exposto, e facendo uso das facultades que me confire o artigo 34 da Lei 1/1983, do 22 de febreiro, de normas reguladoras da Xunta e da súa Presidencia,
DISPOÑO:
Artigo único.-Modifícase o artigo 19 da Orde do 16 de decembro de 2008 pola que se establecen as bases reguladoras e se convocan para 2008 e 2009 as axudas aos traballadores residentes en Galicia para a contratación dun seguro de pagamentos protexidos, que quedan redactado do seguinte xeito:
«Artigo 19º.-Dotación orzamentaria.
As axudas reguladas nesta orde financiaranse con cargo á aplicación orzamentaria 4205.621A.480.0 por un importe de 500.000 para o exercicio 2009. O dito crédito, á vista das solicitudes presentadas, poderá ser modificado e/ou ampliado pola Consellería de Economía e Facenda, do cal se dará a correspondente publicidade no Diario Oficial de Galicia.
Polo menos o 20% dos créditos orzamentarios destinaranse a axudas para o pagamento de pólizas de seguros correspondentes a préstamos hipotecarios para a adquisición de vivendas protexidas.»
Disposición derradeira
Única.-Entrada en vigor.
Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 30 de setembro de 2009.
Marta Fernández Currás
Conselleira de Facenda