Dentro do plan de actividades da Escola Galega de Administración Pública para o ano 2009 e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse os foros sobre a directiva servizos e o incremento da competitividade: unha oportunidade para Portugal, España e Galicia, conforme as seguintes bases:
1. Obxectivos:
Os devanditos foros teñen como obxecto informar sobre a significación, operatividade e efectos da directiva de servizos así como da normativa estatal de transposición daquela. En especial, destacarase o novo réxime xurídico da Administración en materia de autorizacións e licenzas, así como a liberalización da prestación dos servizos, e o impacto da directiva no funcionamento das entidades locais e nos colexios profesionais.
2. Contidos:
Serán tratados, entre outros, os seguintes temas:
-I Foro:
A directiva desde a perspectiva europea: liñas xerais e marco comparado.
A directiva servizos como instrumento de concreción do mercado único; en especial, o seu impacto nos contratos públicos.
A repercusión económica da directiva.
A repercusión da liberalización do sector da enerxía.
A transposición da directiva de servizos en Portugal.
A directiva de servizos desde a vertente da competencia.
-II Foro:
O desenvolvemento do portelo único en España.
O desenvolvemento do portelo único en Portugal.
Elaboración e principios da directiva de servizos.
A boa administración na directiva de servizos.
O procedemento administrativo na directiva de servizos.
O réxime autorizatorio nas administracións públicas tras a directiva de servizos.
A transposición da directiva nos entes locais.
-III Foro:
Encontro cos representantes da Administración, sectores sociais e profesionais afectados pola directiva.
Mesas redondas sobre o impacto da directiva de servizos nos colexios profesionais, na construción, informáticos, no turismo, no comercio, etc.
3. Destinatarios:
Persoal ao servizo da Administración pública galega.
4. Desenvolvemento:
Lugar: Escola Galega de Administración Pública (EGAP), rúa Madrid 2-4, Santiago de Compostela.
Datas:
I Foro: 15 e 16 de outubro.
II Foro: 5 e 6 de novembro.
III Foro: 19 e 20 de novembro.
Duración: 10 horas lectivas cada foro.
Horario:
1º día: mañá e tarde.
2º día: mañá.
5. Número de prazas:
Limitado pola capacidade do local.
6. Solicitudes:
-Tramitación de solicitudes: as solicitudes irán dirixidas ao director da Escola Galega de Administración Pública (polígono das Fontiñas, rúa Madrid 2-4, CP 15707, Santiago de Compostela), segundo o modelo que figura como anexo a esta convocatoria, e serán presentadas no Rexistro Xeral da EGAP, ou ben de calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Serán admitidas inscricións por medio de fax enviado ao número 981 54 63 30 ou por correo electrónico dirixido ao enderezo novas.egap@xunta.es.
-Inscricións fóra de prazo: só serán admitidas, de quedar prazas libres, coa condición de que cumpran os requisitos xerais antes indicados.
As persoas solicitantes poderán obter a confirmación da súa admisión se chaman por teléfono, das 8.30 ás 14.30 horas, aos seguintes números: 981 54 62 41-881 99 70 14.
7. Prazo:
O prazo de presentación de solicitudes finalizará:
-I Foro: o mércores 14 de outubro.
-II Foro: o mércores 4 de novembro.
-III Foro: o mércores 18 de novembro.
8. Modificacións:
A EGAP reserva para si a facultade de interpretar e de resolver as incidencias que poidan xurdir no desenvolvemento dos foros, así como a facultade de cancelalos se o escaso número de solicitudes non xustificase a súa realización.
9. Certificado de asistencia:
Será entregado un certificado de asistencia, ao final dos foros, a aquelas persoas inscritas que participasen asiduamente, e sempre que a súa asistencia sexa igual ou superior ao 85% das horas lectivas programadas. Neste documento aparecerán de forma expresa a natureza da actividade e a data de realización.
Santiago de Compostela, 6 de outubro de 2009.
Pablo Figueroa Dorrego
Director da Escola Galega de Administración Pública
Ver referencia pdf "19800D008P019.PDF"