A Universidade de Santiago de Compostela e a Universidade Autónoma de Barcelona teñen previsto desenvolver un curso de posgrao «Empresa Pública e Emprego Público, un enfoque xurídico, económico e de valores».
A referida acción está relacionada coas accións formativas realizadas pola EGAP e resulta de interese para a formación e o perfeccionamento das/os empregadas/os públicas/os, nos termos da Resolución do 19 de novembro de 2008, pola que se establecen o procedemento e os requisitos de homologación de accións formativas por parte da EGAP.
O devandito curso desenvolverase de acordo coas seguintes bases:
Primeira.-Solicitantes.
Será requisito necesario para a realización deste curso estar cursando ou ter cursados estudos universitarios na data da convocatoria.
Segunda.-Criterios de selección.
A selección das/os aspirantes será efectuada por unha comisión académica designada para este efecto e que terá en conta a titulación ou estudos universitarios, os coñecementos previos no ámbito do emprego público, ou da empresa pública, no ámbito das relacións laborais, así como a experiencia profesional relacionada coa temática do curso; e de ser o caso, farase unha entrevista persoal.
Terceira.-Características do curso.
Duración: 300 horas (200 horas presenciais e 100 virtuais).
Lugar: EGAP, situada no polígono das Fontiñas, rúa de Madrid 2-4, 15707 Santiago de Compostela.
Datas: do 23 de outubro de 2009 ata o 9 de xullo de 2010 (os venres pola tarde) das 16.00 ás 20.00 horas.
Prazas: 35.
Cuarta.-Obxectivos do curso.
O obxectivo perseguido polo curso é implicarse decididamente na formación para a dirección das administracións públicas ou empresas públicas no contexto de valores actual.
Este curso desenvolve unha acción específica de formación de profesionais do emprego público e da empresa pública, onde a calidade é un factor horizontal, así como a formación en temas xurídicos e de valores utilizando ferramentas TIC.
Ademais, pretende facilitar unha potencial e eficaz cualificación profesional nun ámbito actual condicionado pola sociedade da información e das novas tecnoloxías, facilitándolle ás/aos empregadas/os públicas/os a posibilidade dunha maior accesibilidade á actualización profesional que lles facilite acadar maiores cotas de responsabilidade profesional.
O curso pretende:
-Facer accesible a formación de calidade na xestión e dirección no emprego público, e nas empresas públicas, utilizando as TIC.
-Contribuír a formar o alumnado na concepción das administracións e empresas públicas desde as ópticas económica, xurídica e de valores.
-Formar en tecnoloxías como instrumento profesional.
-Favorecer a familiarización co contexto do e-learning contribuíndo á implantación das TIC.
-Afondar no ámbito do coñecemento da empresa pública e do emprego público.
-Fomentar o respecto e a igualdade na actividade e nos empregos públicos.
Metodoloxía.
A metodoloxía utilizada é mixta, combínase a teleformación coa formación presencial.
Quinta.-Contido.
O curso estrutúrase nos seguintes módulos:
Módulo I: módulo de Empresa Pública.
1. Dirección da calidade.
2. Administración de empresas públicas e dirección de persoas.
3. Dirección comercial.
4. Comercio internacional.
5. Dirección financeira, análise e avaliación de proxectos.
6. A E-empresa pública.
Módulo II: módulo xurídico e de valores.
1. Empresa pública e emprego público: escenario e coordenadas actuais.
2. Dereito do traballo individual: o contrato de traballo.
3. Dereito do traballo colectivo: sindical.
4. O dereito procesual.
5. A Seguridade Social.
6. A prevención de riscos laborais.
7. A empresa pública e o emprego público: posibles valores.
8. A prevención de riscos laborais: diversas vías de aproximación.
9. Políticas sociolaborais no marco da igualdade.
10. A educación: implicación na empresa pública e no emprego público na sociedade actual.
Sexta.-Destinatarias/os.
O programa do curso vai dirixido a empregadas/os públicas/os das administracións públicas galegas, profesionais e interesadas/os que pretendan conseguir un maior coñecemento no ámbito da empresa pública e no ámbito das administracións publicas, e das relacións laborais no devandito ámbito.
Sétima.-Pagamento da matrícula.
O importe da matrícula é de 2.800 euros.
O pagamento da taxa de matriculación deberá efectuarse dentro dos 5 días seguintes á comunicación por parte da dirección do curso da aceptación das/os alumnas/os neste.
Oitava.-Prazo de inscrición e presentación de instancias.
O prazo para inscrición finalizará o día 20 de outubro.
Para inscribirse, as/os interesadas/os deberán enviar un curriculum vitae a adamaria.perez@rai.usc.es incluíndo necesariamente:
-Fotocopia do DNI.
-Orixinal ou copia cotexada do título de diplomada/o ou licenciada/o, ou estudos e experiencia profesional alegada.
-Documentación acreditativa dos méritos incluídos no currículo.
Igualmente poderán dirixirse ao enderezo electrónico sinalado anteriormente, para obter información sobre o curso; así como aos números de teléfonos 982 28 59 00 (ext. 24483) ou 935 81 22 77.
Santiago de Compostela, 1 de outubro de 2009.
Pablo Figueroa Dorrego
Director da Escola Galega de Administración Pública