A orde da Consellería de Economía e Industria do 22 de abril de 2009 (DOG nº 120, do 22 de xuño), aproba as bases que rexerán a convocatoria de axudas correspondentes a diversas accións de comunicación e divulgación científica e tecnolóxica (Diverciencia), no marco do Programa de comunicación e sensibilización social (CCS) do Plan Galego de Investigación, Desenvolvemento e Innovación Tecnolóxica (Incite) para o ano 2009.
No artigo 3º (Beneficiarios) do anexo I da mencionada Orde do 22 de abril de 2009 determínanse os requisitos que deberán cumprir os candidatos das axudas. Pola súa banda no artigo 7º (Instrución dos procedementos) establécese a tramitación e instrución das solicitudes de subvención e no artigo 8º (Comisión de valoración) sinálase que a selección das solicitudes admitidas faraa a comisión de valoración, que será o órgano colexiado encargado de valorar as solicitudes de acordo cos criterios obxectivos fixados no artigo 9º (Criterios de valoración), así como de propoñer a concesión ou denegación das subvencións aos interesados/as.
De conformidade co anterior, unha vez revisados e completados os expedientes, as solicitudes admitidas foron avaliadas pola comisión de valoración na súa reunión do 7 de setembro e a Dirección Xeral de Investigación, Desenvolvemento e Innovación como órgano instrutor elevou a correspondente proposta de resolución ao órgano de resolución.
En consecuencia, atendendo á proposta elaborada polo órgano instrutor, esta consellería
RESOLVE:
Primeiro.-Concederlles as axudas ás universidades do sistema universitario galego, centros tecnolóxicos recoñecidos pola Dirección Xeral de I+D+i, organismos dependentes da comunidade autónoma ou da Administración xeral do Estado que desenvolvan actividades de investigación ou divulgación da ciencia e da tecnoloxía, organismos dependentes das entidades locais galegas que desenvolvan actividades de investigación ou divulgación da ciencia e da tecnoloxía e institucións sen ánimo de lucro que se relacionan no anexo I desta resolución. O importe concedido estará distribuído nas diferentes partidas da memoria económica que figurará no taboleiro persoal da orde (https://axudasindustria.xunta.es), os beneficiarios deberan axustarse a esta distribución, salvo autorización previa da súa modificación polo órgano instrutor.
Segundo.-No caso de producirse algunha renuncia nas axudas do anexo I, a Dirección Xeral de Investigación, Desenvolvemento e Innovación, procederá, se é o caso, e tendo en conta os remanentes de crédito, a adxudicarlles a dita axuda a outras solicitudes de conformidade coa lista de suplentes que figura no anexo II desta de resolución, en orde decrecente segundo a puntuación obtida por cada solicitude.
Terceiro.-A inobservancia por parte dos solicitantes beneficiarios, de calquera das condicións establecidas na orde de convocatoria do 22 de abril de 2009 (DOG nº 120, do 22 de xuño) suporá a perda do dereito a percibir a axuda correspondente. En particular deberán atender a xustificación da subvención que se recolle no artigo 17 da Orde do 22 de abril de 2009, e que inclúe a seguinte documentación:
a) Memoria das actividades realizadas, incluíndo copia do material impreso e audiovisual, comunicacións, publicidade ou calquera outro material elaborado.
b) Memoria económica xustificativa do custo das actividades realizadas, que conterá:
1. Unha relación dos gastos realizados, coa identificación do acredor e do documento, o seu importe co IVE separado, data de emisión e data de pagamento.
2. Orixinal ou copia compulsada das facturas e demais documentos de valor probatorio equivalente que se correspondan coa relación a que fai referencia o parágrafo anterior e da documentación acreditativa do pagamento (considerarase gasto realizado o que foi efectivamente pagado con anterioridade á data límite de xustificación).
3. No caso de adquisición de material inventariable ou prestación de servizos tecnolóxicos por empresas de consultoría ou asistencia técnica por importe superior a 12.000 euros, deberán achegarse as tres ofertas de diferentes provedores. Será necesaria unha memoria xustificativa cando a elección non recaia na proposta económica máis vantaxosa.
Non obstante, cando o/a solicitante pertenza a algunha universidade galega, centro tecnolóxico de carácter público ou centro de investigación público non dependente da Xunta de Galicia, deberá presentarse a documentación a que fai referencia o parágrafo a) e o parágrafo b 1 e b 3 e unha certificación emitida pola intervención ou órgano que teña atribuídas as facultades de control da toma de razón en contabilidade.
c) Unha relación doutras axudas que financiaron a actividade subvencionada, indicando en todo caso o seu importe e procedencia.
d) As institucións sen ánimo de lucro presentarán, no caso de que non o fixesen no momento da presentación da solicitude, copia cotexada da escritura pública de constitución e dos estatutos da asociación ou entidade que formula a solicitude.
e) Certificación expedida pola entidade bancaria en que se sinale o número de conta do/da beneficiario/a onde se deba realizar o pagamento.
Os beneficiarios deberán axustarse, na xustificación, aos modelos normalizados que poderán obter na páxina web http://economiaeindustria.xunta.es/dxidi, na sección Servizos Propios-Informes/Xustificantes de gasto ou ben no taboleiro da orde (https://axudasindustria.xunta.es).
Cuarto.-Os solicitantes que non aparecen nos anexos I ou II deberán entender desestimada a súa solicitude por non alcanzar a puntuación mínima, establecida pola comisión de valoración en 60 puntos.
Quinto.-Contra esta resolución de concesión, que é definitiva en vía administrativa, cabe interpoñer, de ser o caso:
a) Recurso potestativo de reposición ante o órgano que ditou a resolución, no prazo dun mes contando a partir do día seguinte ao da súa publicación no Diario Oficial de Galicia, segundo os artigos 116 e 117 da Lei 30/1992, do 26 de novembro, de réxime xurídico das administracións públicas e do procedemento administrativo común.
b) Ou ben directamente recurso contencioso-administrativo ante a Sala do Contencioso-Administrativo do Tribunal Superior de Xustiza de Galicia, de conformidade co establecido nos artigos 10 e 46 da Lei 29/1998, do 13 de xullo, reguladora da xurisdición contencioso-administrativa, no prazo de dous meses contados desde o día seguinte ao da súa publicación no Diario Oficial de Galicia.
E todo iso sen prexuízo de que os interesados poidan exercer calquera outro dereito que consideren oportuno.
Disposición derradeira
Esta resolución entrara en vigor o día seguinte ao da súa publicación no Diario Oficial de Galicia.
Santiago de Compostela, 11 de setembro de 2009.
P.D. (Orde 30-4-2009)
José Riesgo Boluda
Secretario xeral da Consellería de Economía
e Industria
Ver referencia pdf "19200D002P007.PDF"
