O Concello de Poio remite o proxecto de modificación puntual referido, conforme o artigo 85.5º da Lei 9/2002, do 30 de decembro, de ordenación urbanística e protección do medio rural de Galicia.

I. Antecedentes.

1. O Concello de Poio dispón na actualidade de PXOM vixente, aprobado definitivamente o 28 de xullo de 2000.

2. O catálogo de edificios e conxuntos do termo municipal foi aprobado o 25 de setembro de 2001.

3. A documentación achegada consiste na copia dilixenciada por triplicado do expediente municipal e proposta de MP do catálogo.

O proxecto, integrado por memoria e planos redactado polos arquitectos José Antonio Sueiro Sueiro e Elías Cueto Álvarez, conta con visado colexial do 4 de xuño de 2009, e considérase que é suficiente para o alcance e finalidade da modificación.

4. A Dirección Xeral de Desenvolvemento Sostible da Consellería de Medio Ambiente emitiu a decisión do 25 de marzo de 2008, pola que se resolve sobre a innecesariedade de someter esta modificación puntual ao procedemento de avaliación ambiental estratéxica.

5. Non se solicitou informe previo á aprobación inicial por concorrer as circunstancias do artigo 93.4º da LOUG.

6. A modificación puntual foi aprobada inicialmente polo Concello Pleno, en sesión do 29 de xullo de 2008 e sometido a información pública. Non houbo alegacións.

7. No expediente constan os informes dos servizos xurídicos e técnicos do concello.

8. Dos informes sectoriais que solicitou o concello consta a emisión de informe favorable da Dirección Xeral de Patrimonio Cultural da Consellería de Cultura e Deporte, con data do 13 de novembro de 2008.

9. A modificación aprobada provisionalmente polo pleno en sesión do 27-1-2009.

10. O Concello Pleno, en sesión do 30 de xuño de 2009, á vista dos informes do asesor xurídico e da secretaría, con datas do 8 e 11 de xuño de 2009 respectivamente, ratificou o interese público municipal na modificación puntual, e rectificou o erro existente nos documentos e proxecto que forman o expediente.

II. Consideracións e fundamentación.

A) Con data do 19 de agosto de 2009, a Secretaría Xeral de Ordenación do Territorio e Urbanismo, visto o informe emitido polo Servizo de Urbanismo da Delegación Territorial de Pontevedra, elevou proposta de resolución, no que se expresa o seguinte:

1. O proxecto de modificación ten por obxecto a anulación da ficha 16-B15 do catálogo de edificios e conxuntos do termo municipal, correspondente á edificación situada no nº 1 da rúa Clemente Echeverría, en Raxó, con referencia catastral 0548602N G2904N0001XX.

2. O inicio do expediente motívase pola contradición existente entre a protección do ben sinalado e as determinacións do PXOM para o quinteiro no que se empraza, sendo que a aliñación que fixa o PXOM atravesa a edificación polo que está fóra de ordenación. No entanto, o grao de protección impide o seu traslado ou derruba.

3. Sinálase no proxecto de MP e nos informes correspondentes emitidos pola Consellería de Cultura e Deporte en relación coa ficha do catálogo, que a edificación non presenta interese arquitectónico singular e que unicamente posúe valor ambiental que quedaría descontextualizado co desenvolvemento previsto no contorno polo PXOM.

4. As razóns de interese xeral nas que se fundamenta a modificación son resolver as contradicións entre documentos do planeamento e, por tanto, posibilitar a execución das aliñacións definidas no PXOM para resolver problemas de circulación.

Esta finalidade pode incluírse entre as razóns do artigo 94.1º da LOUG e fundamenta o interese público.

B) De conformidade cos artigos 89 e 93.4º da Lei 9/2002, do 30 de decembro, de ordenación urbanística e protección do medio rural de Galicia, e co artigo 1 do Decreto 316/2009, do 4 de xuño, polo que se establece a estrutura orgánica da Consellería de Medio Ambiente, Territorio e Infraestruturas, a competencia para resolver sobre a aprobación definitiva das modificacións puntuais dos plans xerais de ordenación municipal correspóndelle á Consellería de Medio Ambiente, Territorio e Infraestruturas.

III. Resolución.

Visto canto antecede,

RESOLVO:

Primeiro.-De acordo co punto 5.a) do artigo 85 da Lei 9/2002, do 30 de decembro, de ordenación urbanística e protección do medio rural de Galicia, aprobar definitivamente a modificación puntual do PXOM de Poio (Pontevedra) para descatalogación do ben nº 16-b15, sito na rúa Clemente Echeverría, en Raxó.

Segundo.-Contra esta orde cabe interpoñer recurso contencioso-administrativo ante a sala correspondente do Tribunal Superior de Xustiza de Galicia, no prazo de dous meses, que se contarán desde o día seguinte ao da súa publicación, segundo dispoñen os artigos 10 e 46 da Lei 29/1998, do 13 de xullo, reguladora da xurisdición contencioso-administrativa.

Terceiro.-De conformidade co disposto polos artigos 92 da Lei 9/2002 e 70 da Lei 7/1985, do 2 de abril, reguladora das bases de réxime local, o concello deberá publicar no BOP a normativa e ordenanzas da modificación aprobada definitvamente.

Cuarto.-Notifíquese esta orde ao concello e publíquese no Diario Oficial de Galicia.

Santiago de Compostela, 20 de agosto de 2009.

Agustín Hernández Fernández de Rojas

Conselleiro de Medio Ambiente, Territorio

e Infraestruturas