O Decreto 242/2008, do 9 de outubro, polo que se regulan a natureza, os fins e os órganos de goberno das escolas universitarias de enfermaría dependentes da Consellería de Sanidade, atribúe no seu artigo 6 a) a presidencia do padroado destas escolas á conselleira de Sanidade, ou persoa en quen delegue.

Así, por Orde do 14 de xaneiro de 2009, fíxose efectiva aquela posibilidade de delegación, atribuíndollela aos daquela delegados provinciais da Consellería de Sanidade.

Tendo en conta as modificacións organizativas introducidas tanto polo Decreto 79/2009, do 19 de abril, polo que se establece a estrutura orgánica da Xunta de Galicia, coma polo Decreto 83/2009, do 21 de abril, polo que se fixa a estrutura orgánica dos departamentos da Xunta de Galicia e, posteriormente, a través das novas estruturas orgánicas da Consellería de Sanidade e do Servizo Galego de Saúde, aprobadas polos decretos 310 e 311/2009, respectivamente, cómpre adaptar aquela delegación ás necesidades actuais e ás disposicións que en materia de estrutura orgánica acabamos de citar.

Na súa virtude, en uso das facultades que me confire o artigo 38 da Lei 1/1983, do 22 de febreiro, reguladora da Xunta e da súa presidencia, modificada pola Lei 11/1988, do 20 de outubro, e conforme o disposto no artigo 13 da Lei 30/1992, do 26 de novembro, de réxime xurídico das administracións públicas e do procedemento administrativo común, e no artigo 6 do Decreto 242/2008, do 9 de outubro, polo que se regulan a natureza, os fins e os órganos de goberno das escolas universitarias de enfermaría dependentes da Consellería de Sanidade,

DISPOÑO:

Artigo único.-Delegar nos titulares das xerencias dos complexos hospitalarios da Coruña e Ourense a presidencia dos padroados das escolas universitarias de enfermaría dependentes da Consellería de Sanidade na Coruña e Ourense, respectivamente.

Disposición derrogatoria

Queda derrogada calquera outra disposición de igual ou inferior rango que se opoña ao establecido nesta orde.

Disposición derradeira

Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 3 de setembro de 2009.

María del Pilar Farjas Abadía

Conselleira de Sanidade