Dentro das actividades programadas para o ano 2009, e conforme as funcións atribuídas pola Lei 1/2007, do 15 de xaneiro, da Academia Galega de Seguridade Pública, anúnciase o desenvolvemento do curso básico de capacitación para a categoría de policía dos corpos de policía local, segundo o previsto no artigo 35.2º da Lei 4/2007, do 20 de abril, de coordinación das policías locais, e no artigo 16 do Decreto 243/2008, do 16 de outubro, que deberá desenvolverse conforme as seguintes bases:
Obxectivos.
Dotar os policías dunha formación teórico-práctica de carácter inicial, específica para as funcións propias dos corpos de policía local, facilitándolles a competencia e capacidade necesarias para o posterior desempeño da súa actividade profesional.
Destinatarias/os.
O curso vai dirixido a todas aquelas persoas que superaron as correspondentes probas de acceso á categoría de policía dos diferentes concellos de Galicia.
Inscrición.
A inscrición é gratuíta.
A academia procederá a reservar definitivamente a correspondente praza segundo a comunicación da inscrición por parte do concello de procedencia.
Prazas.
Sen límite.
Solicitudes.
1. Os concellos deberán remitir un escrito á Academia Galega de Seguridade Pública en que soliciten as correspondentes prazas de reserva e certificación das persoas que superaron as correspondentes probas de oposición á categoría de policía, así como cubrir o anexo con todos os datos nel reflectidos referidos aos solicitantes de praza.
2. O prazo para a remisión de escritos rematará o día 9 de outubro de 2009.
3. Os escritos deberán enviarse á Academia Galega de Seguridade Pública: avenida da Cultura s/n, 36680 A Estrada. Previamente remitiranse por fax (886 20 61 22) para axilizar os correspondentes trámites.
Contido e duración do curso.
O curso desenvolverase na Academia Galega de Seguridade Pública, en sesións de mañá e tarde, de luns a venres, e nel trataranse, entre outros, os seguintes módulos:
-Misión e funcións policiais.
-Policía de protección e seguridade.
-Policía de tráfico e transporte.
-Policía xudicial e de investigación.
-Policía administrativa.
-Módulo transversal.
-Módulo profesional: formación en centros de traballo (concellos).
O curso terá unha duración de nove meses, seis de formación teórica na academia e tres de prácticas nos respectivos concellos de procedencia.
Desenvolvemento do curso.
O alumnado da Academia Galega de Seguridade Pública durante o seu período de permanencia nesta rexerase polo seu regulamento de réxime interior, publicado pola Orde do 4 de febreiro de 2009 da Consellería de Presidencia, Administracións Públicas e Xustiza, no DOG número 30, do 12 de febreiro.
Datas e horario:
-O curso, de carácter teórico-práctico, desenvolverase do 19 de outubro ao 30 de abril de 2010, en horario de luns a xoves das 9.00 ás 14.00 e das 16.00 ás 19.00 horas, e venres das 9.00 ás 14.00 horas. Desde o 23 de decembro de 2009 ao 6 de xaneiro de 2010 desenvolverase o primeiro período de prácticas nos concellos.
-O período de prácticas final comezará o 1 de maio e rematará o 16 de xullo de 2010.
Certificado.
De acordo co previsto no artigo 19 de Decreto 243/2008, do 16 de outubro, de desenvolvemento da Lei 4/2007, unha vez superado o curso e o período de prácticas, a Agasp emitirá un informe que certifique a dita superación, de modo que o concello de pertenza poida proceder ao nomeamento como persoal funcionario de carreira e á toma de posesión na categoría de policía.
Modificacións.
A Academia Galega de Seguridade Pública poderá modificar o desenvolvemento do curso para adaptalo ás necesidades da Administración e ás continxencias que poidan xurdir.
A Estrada, 25 de agosto de 2009.
José Carlos García Bouzas
Director xeral da Academia Galega de Seguridade Pública
Ver referencia pdf "17000D012P034.PDF"