O Plan galego de preparación e resposta á pandemia de gripe (PGPRPG) ten por obxectivos xerais reducir o impacto da pandemia na saúde da poboación de Galicia e manter nela o funcionamento dos servizos esenciais para a sociedade; tomar medidas que reduzan a difusión de virus da gripe pandémica en Galicia, persoa a persoa, e garantir que a resposta e as medidas adoptadas en Galicia se correspondan coas recomendacións da Organización Mundial da Saúde en cada fase de progresión cara á pandemia.

Estes obxectivos xerais do PGPRPG son unha adaptación a Galicia dos obxectivos do plan español coa finalidade de impulsar o desenvolvemento das actividades que lle son propias.

As actividades que recolle o plan español artéllanse en cinco elementos clave:

1. Estrutura organizativa e coordinación;

2. Vixilancia epidemiolóxica e virolóxica;

3. Vacinas e fármacos antivirais;

4. Programas de resposta dos servizos sanitarios;

5. Comunicación.

No marco deste plan, Galicia ten que dotarse dos seus propios elementos organizativos e comunicativos, así como fixar unhas actividades que se adapten á fase de evolución cara á pandemia na cal nos atopemos en cada momento.

Isto supón que o PGPRPG ten un carácter evolutivo e que se modificará á medida que se desenvolven actividades e se mude de fase; feito que obriga, pois, a que se fagan actualizacións periódicas do plan.

O elemento organizativo e coordinador único en Galicia é a Comisión Asesora do Plan galego de preparación e resposta á pandemia de gripe (en diante Comisión), que se creou pola orde da Consellería de Sanidade do 18 de febreiro de 2005.

O pasado 24 de abril de 2009, a OMS informaba que se illará un novo virus da gripe do tipo A, subtipo H1N1, que ten potencialidade pandémica.

Non se coñece cal vai ser o futuro inmediato da infección. Alí onde hai transmisión comunitaria sostida, a infección co novo virus A (H1N1) está amplamente difundida e, xunto con este virus, están a cocircular outros virus da gripe. Coa información de que se dispón, non se pode rexeitar a inminencia dunha nova onda epidémica cunha incidencia moi superior á da gripe estacional, que pode supor unha gran presión sobre o sistema asistencial.

Por iso se acelerou a preparación fronte a unha posible onda de maior magnitude, na cal se viña traballando desde hai anos, pero co foco posto na gripe aviaria; este novo virus obriga a modificar e adaptar os protocolos establecidos á nosa realidade.

Na procura de acadar a máxima adaptación dos protocolos e decisións que se van adoptar, considérase necesario contar cun grupo de traballo que analice os escenarios epidemiolóxicos e formule directrices para a elaborar os protocolos máis efectivos en cada momento.

En consecuencia, conforme as facultades que me confiren os artigos 34.6º e 38 da Lei 1/1983, do 22 de febreiro, reguladora da Xunta e da súa Presidencia, reformada pola Lei 11/1988, do 22 de outubro,

DISPOÑO:

Artigo 1º.-Obxecto.

1. Esta orde ten por obxecto a constitución do grupo de traballo que se chamará Comité Científico do Plan galego de preparación e resposta á pandemia de gripe, en diante o comité, segundo o previsto no artigo 5 da Orde do 18 de febreiro de 2005, de creación da Comisión Asesora do Plan galego de preparación e resposta á pandemia de gripe.

2. Este grupo de traballo actuará baixo a coordinación da Dirección Xeral de Saúde Pública e Planificación da Consellería de Sanidade.

Artigo 2º.-Funcións.

O comité terá como funcións:

a) A avaliación do manexo da gripe pandémica.

b) Identificar as actividades prioritarias de control e seguimento da pandemia na Comunidade Autónoma de Galicia.

c) Facer recomendacións de actuacións xenéricas derivadas do coñecemento da situación epidemiolóxica.

d) Avaliar o manexo dos enfermos, en colaboración cos seus profesionais médicos responsables, e emitir as recomendacións terapéuticas pertinentes.

e) Analizar os recursos necesarios para o correcto desenvolvemento das actividades de control da pandemia.

f) Propoñer e facilitar a incorporación de especialistas cuxa participación no comité se considere necesaria.

Artigo 3º.-Composición.

O comité estará composto por entre seis e dez profesionais da comunidade autónoma, con demostrada experiencia en aspectos relacionados coa epidemioloxía, co manexo, diagnóstico, tratamento e seguimento de enfermidades transmisibles producidas por virus.

A composición terá en conta a diversidade de disciplinas que require a análise e a xestión deste tipo de situacións.

Artigo 4º.-Designación dos membros.

Os membros do comité serán nomeados e cesados por acordo da conselleira de Sanidade, por proposta da Dirección Xeral de Saúde Pública e Planificación. O nomeamento farase por un período máximo de tres anos contado desde a súa data.

Disposicións derradeiras

Primeira.-Facúltase a directora xeral de Saúde Pública e Planificación para tomar as medidas adecuadas en relación coa execución e codesenvolvemento desta orde.

Segunda.-Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 29 de xuño de 2009.

Pilar Farjas Abadía

Conselleira de Sanidade