Visto o expediente de clasificación da Fundación ad Sactum Iacobum Peregrinatio, con domicilio en Santiago de Compostela.
Supostos de feito:
1. Agustín Dosil Maceira, na súa condición de vicepresidente do padroado da fundación, formulou solicitude de clasificación para os efectos da súa inscrición no Rexistro de Fundacións de Interese Galego.
2. A fundación foi constituída en escritura pública outorgada en Santiago de Compostela o vinte e oito de xullo de dous mil oito, ante o notario Nelson Rodicio Rodicio, co número de protocolo mil catrocentos cincuenta e dous, polo Arcebispado de Santiago de Compostela, representado polo arcebispo Julián Barrio Barrio. Esta escritura foi emendada por outra do dezaoito de marzo de dous mil nove, outorgada ante o mesmo notario co número de protocolo setecentos oitenta e seis.
3. Segundo consta no artigo 6 dos seus estatutos, a fundación ten por obxecto:
Promoción e difusión da peregrinación a Santiago de Compostela.
Atención e acollida aos peregrinos tanto no camiño como na meta.
Construción e xestión de albergues, centros de acollida e de todas aquelas actividades que comporta a peregrinación na actualidade.
Estudo, investigación e publicación en todos os ámbitos que entraña o feito xacobeo.
Conservación e promoción do patrimonio cultural, legado da peregrinación ao longo dos séculos.
Busca e canalización dos recursos necesarios para o desenvolvemento don fins sinalados.
4. O padroado da fundación estará integrado por Marcelino Oreja Aguirre como presidente; Agustín Dosil Maceira como vicepresidente; Elisardo Temperán Villaverde como secretario; Manuel Jesús Formoso Fernández como vicesecretario; José Carlos de Miguel Domínguez como tesoureiro, e por Jenaro Cebrián Franco, José María Pérez Bazús, Manuel Ares Camba, Manuel María Mora Pida da Veiga, Marcelino Agís Villaverde, José María Muñoz de Sol, Eduardo París López Sors y Somoza, José Fernández lago, Ángel Andrés Sicart Giménez, Juan José Cebrián Franco, Fernando López Alsina, José Eduardo López Pereira, Andrés José Precedo Ledo, José Manuel García Iglesias e Segundo Leonardo Pérez López como vogais.
5. A comisión integrada polos secretarios xerais de todas as consellerías eleva ao conselleiro de Presidencia, Administracións Públicas e Xustiza proposta de clasificación como de interese cultural da Fundación ad Sactum Iacobum Peregrinatio, dado o seu obxecto e finalidade, polo que, cumpridos os requisitos exixidos na Lei 12/2006, do 1 de decembro, de fundacións de interese galego, e segundo establece o artigo 32.1º e 2º do Decreto 248/1992, do 18 de xuño, polo que se aproba o Regulamento de organización e funcionamento do protectorado das fundacións de interese galego, procede a súa clasificación como de interese cultural e a súa adscrición á Consellería de Cultura e Turismo.
Fundamentos de dereito:
1. O artigo 34 da Constitución española recoñece o dereito de fundacións para fins de interese xeral de acordo coa lei, e o artigo 27.26º do Estatuto de autonomía para Galicia outórgalle competencia exclusiva sobre o réxime das fundacións de interese galego.
2. De acordo co disposto no artigo 32.2º c) do Decreto 248/1992, do 18 de xuño, polo que se aproba o Regulamento de organización e funcionamento do protectorado das fundacións de interese galego, corresponde a esta consellería a clasificación da fundación e a adscrición á consellería correspondente, que exercerá plenamente o protectorado sobre ela.
3. Á vista do que antecede, pódense considerar cumpridas as finalidades tanto legais como regulamentarias establecidas para o caso, de acordo coa proposta realizada pola Comisión de Secretarios Xerais na súa reunión do día dezaoito de maio de dous mil nove.
Vista a Constitución española de 1978, o Estatuto de autonomía de Galicia (Lei orgánica 1/1981, do 6 de abril), a Lei 12/2006, do 1 de decembro, de fundacións de interese galego, así como as demais normas de desenvolvemento e de xeral aplicación.
Na súa virtude,
DISPOÑO:
Clasificar de interese cultural a fundación ad Sactum Iacobum Peregrinatio e adscribila á Consellería de Cultura e Turismo, que exercerá plenamente o protectorado sobre ela.
Santiago de Compostela, 22 de maio de 2009.
Alfonso Rueda Valenzuela
Conselleiro de Presidencia, Administracións Públicas e Xustiza