Mediante o Decreto 79/2009, do 19 de abril, establécese a estrutura orgánica da Xunta de Galicia e intégrase nela a Consellería de Economía e Industria.

A actividade administrativa da Consellería de Economía e Industria supón unha concentración de funcións arredor do seu titular que aconsella, dado o seu volume, recorrer á delegación de competencias na Administración periférica desta sen esquecer o debido respecto aos principios que informan a actividade administrativa e que a nosa Constitución recolle no seu artigo 103.1º.

A delegación de competencias permite a axilización administrativa necesaria e redunda en beneficio tanto da Administración como dos administrados, dentro do máis rigoroso respecto ás garantías xurídicas que a tutela dos intereses públicos exixe.

A Orde do 30 de abril de 2009 sobre delegación de competencias na Secretaría Xeral da Consellería de Economía e Industria (DOG nº 87, do 6 de maio) encárgase de delimitar as delegacións de competencias nese órgano. Non obstante, como complemento á devandita orde, é preciso ditar unha nova orde de delegación expresa nos departamentos territoriais desta consellería sobre certas cuestións.

Por isto, facendo uso das facultades que me confiren os artigos 43.3º da Lei 1/1983, do 22 de febreiro, de normas reguladoras da Xunta e a súa Presidencia, o artigo 13 da Lei 30/1992, do 26 de novembro, de réxime xurídico das administracións públicas e do procedemento administrativo común, e demais disposicións de xeral aplicación,

DISPOÑO:

Artigo 1º

Delégase nos xefes/as territoriais da Consellería de Economía e Industria a designación das comisións de servizo con dereito a indemnización previstas no artigo 4 do Decreto 144/2001, do 7 de xuño, do persoal destinado nos departamentos territoriais.

Artigo 2º

A delegación de competencias efectuada nesta orde comprende tamén a resolución dos recursos potestativos de reposición que se interpoñan contra os actos administrativos ditados no exercicio das facultades delegadas.

Artigo 3º

As resolucións administrativas que se adopten facendo uso da delegación de competencias conferida por esta orde farán constar expresamente esta circunstancia e consideraranse ditadas polo órgano delegante.

Artigo 4º

O conselleiro poderá reclamar, en calquera momento, o exercicio das competencias que son delegadas por esta orde, das cales quedan excluídos, en todo caso, os supostos previstos no artigo 13.2º da Lei de réxime xurídico das administracións públicas e do procedemento administrativo común e no artigo 44.2º da Lei de normas reguladoras da Xunta e da súa Presidencia.

Disposición derrogatoria

Quedan derrogadas todas aquelas disposicións de igual ou inferior rango que se opoñan ao previsto nesta orde.

Disposición derradeira

Esta orde entrará en vigor o mesmo día da súa publicación no Diario Oficial de Galicia.

Santiago de Compostela, 8 de xuño de 2009.

Javier Guerra Fernández

Conselleiro de Economía e Industria