Dentro do plan de actividades da Escola Galega de Administración Pública para o ano 2009, e de acordo coas funcións atribuídas pola Lei 4/1987, do 27 de maio, de creación da escola, e pola Lei 10/1989, do 10 de xullo, de modificación da anterior, convócanse as Xornadas sobre técnica normativa conforme as seguintes bases:
1. Obxectivos.
As xornadas preséntanse tendo como punto de partida a necesidade de promulgar normas eficaces e de alta calidade técnica que posibiliten políticas públicas que satisfagan as exixencias do interese xeral e as necesidades dos cidadáns. Preténdese achegar aos participantes nocións sobre técnica normativa, en particular sobre elaboración de textos legais, nas súas diferentes fases, previa e parlamentaria, e os problemas derivados da devandita elaboración, así como da vixencia da norma, en especial no Estado autonómico español actual. Finalmente analizaranse as especificidades do caso galego e no dereito comparado, así como os procesos de avaliación normativa.
2. Contidos.
Serán tratados, entre outros, os seguintes temas:
-A avaliación normativa.
-A redacción de normas en España e nas comunidades autónomas. A normativa estatal e autonómica sobre a materia. Análise.
-A elaboración de normas na fase previa. O labor das secretarías xerais.
-O papel dos consellos consultivos na redacción normativa: control de legalidade e de oportunidade.
-A técnica normativa da elaboración das leis. A fase parlamentaria da súa tramitación.
-A redacción de normas na Comunidade Autónoma de Galicia. Análise do procedemento parlamentario. Taller práctico.
-A técnica normativa no ámbito do dereito comparado.
3. Destinatarios.
Persoal ao servizo da Administración pública galega, especialmente aqueles vinculados á tarefa da elaboración e redacción de normas, e interesados en xeral.
4. Desenvolvemento.
Lugar: Escola Galega de Administración Pública (EGAP); rúa de Madrid, 2-4, Santiago de Compostela.
Datas: 25 e 26 de xuño de 2009.
Duración: 9 horas lectivas.
Horario:
-Día 25 de xuño, das 9.30 ás 14.00 horas e das 17.00 ás 19.30 horas.
-Día 26 de xuño, das 10.00 ás 14.00 horas.
5. Número de prazas.
Limitado pola capacidade do local.
6. Solicitudes.
-Tramitación de solicitudes: as solicitudes irán dirixidas ao director da Escola Galega de Administración Pública (polígono das Fontiñas; rúa de Madrid, 2-4, CP 15707, Santiago de Compostela), segundo o modelo que figura como anexo a esta convocatoria, e serán presentadas no rexistro xeral da EGAP, ou ben de calquera das formas previstas no artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común. Serán admitidas inscricións por medio de fax enviado ao número 981 54 63 30 ou por correo electrónico dirixido ao enderezo novas.egap@xunta.es
-Inscricións fóra de prazo: só serán admitidas, de quedar prazas libres, coa condición de que cumpran os requisitos xerais antes indicados.
As persoas solicitantes poderán obter a confirmación da súa admisión se chaman por teléfono, das 8.30 ás 14.30 horas, aos seguintes números: 981 54 62 41-881 99 70 14.
7. Prazo.
O prazo de presentación de solicitudes finalizará o martes 23 de xuño de 2009.
8. Modificacións.
A EGAP reserva para si a facultade de interpretar e de resolver as incidencias que poidan xurdir no desenvolvemento das xornadas, así como a facultade de cancelalas se o escaso número de solicitudes non xustificase a súa realización.
9. Certificado de asistencia.
Seralles entregado un certificado de asistencia, ao final das xornadas, a aquelas persoas inscritas que participasen asiduamente, e sempre que a súa asistencia sexa igual ou superior ao 85% das horas lectivas programadas. Neste documento aparecerán de forma expresa a natureza da actividade e a data de realización.
Santiago de Compostela, 10 de xuño de 2009.
Pablo Figueroa Dorrego
Director da Escola Galega de Administración Pública
Ver referencia pdf "11600D006P029.PDF"