Mediante o Decreto 79/2009, do 19 de abril, estableceuse a estrutura orgánica da Xunta de Galicia, e na súa virtude foron aprobados o Decreto 82/2009, do 21 de abril, polo que se establecen os centros directivos dependentes da Presidencia da Xunta de Galicia e o Decreto 83/2009, do 21 de abril, polo que se fixa a estrutura orgánica dos departamentos da Xunta de Galicia.
Como consecuencia da nova estrutura determinada polos anteriores decretos, e de conformidade co establecido nas respectivas disposicións transitorias, cómpre determinar a adscrición dos órganos dependentes da suprimida Dirección Xeral de Promoción Industrial e Sociedade da Información aos novos centros directivos dependentes da Presidencia da Xunta de Galicia e da Consellería de Economía e Industria, mentres non se regulen por decreto as súas novas estruturas orgánicas.
Así, en uso das competencias conferidas polos artigos 34 e 38 da Lei 1/1983, do 22 de febreiro, de normas reguladoras da Xunta e da súa Presidencia,
DISPOÑEMOS:
Ata que se regulen por decreto as novas estruturas orgánicas, as competencias correspondentes aos órganos dependentes da suprimida Dirección Xeral de Promoción Industrial e Sociedade da Información serán asumidas temporalmente polos seguintes centros directivos:
1. O Instituto Galego de Promoción Económica asumirá as competencias correspondentes á Subdirección Xeral de Promoción Industrial e Comercio Exterior, aínda que ata o 31 de decembro de 2009 as competencias relativas ás materias de promoción industrial, estruturación sectorial, excelencia, calidade empresarial, internacionalización e comercio exterior e executadas con cargo ao programa 741A serán exercidas pola secretaría xeral desta consellería.
2. A Secretaría Xeral de Modernización e Innovación Tecnolóxica asumirá as competencias correspondentes á Subdirección Xeral de Desenvolvemento da Sociedade da Información e ao Servizo de Desenvolvemento da Sociedade da Información en canto a infraestruturas e promoción das novas tecnoloxías no ámbito da cidadanía e das administracións públicas, mentres que as devanditas competencias de promoción no ámbito empresarial seguirán correspondendo á Consellería de Economía e Industria.
A Comisión Interdepartamental para a Sociedade da Información e o Coñecemento, que estaba adscrita á Consellería de Innovación e Industria a través da Dirección Xeral de Promoción Industrial e Sociedade da Información, quedará igualmente adscrita á Secretaría Xeral de Modernización e Innovación Tecnolóxica.
Disposición derradeira
Esta orde entrará en vigor o mesmo día da súa publicación no Diario Oficial de Galicia.
Alfonso Rueda Valenzuela Javier Guerra Fernández
Conselleiro de Presidencia, Conselleiro de Economía e Industria
Administracións Públicas e Xustiza
