A Lei 9/1996, do 18 de outubro, de incompatibilidades dos membros da Xunta de Galicia e altos cargos da Administración autonómica, establece no seu artigo 8, para os cargos públicos incluídos no seu ámbito de aplicación, a obriga de formular declaración de actividades e de bens patrimoniais.
Pola súa banda, o Decreto 205/2008, do 4 de setembro, polo que se regulan os rexistros de actividades e de bens patrimoniais de altos cargos da Xunta de Galicia, dispón no seu artigo 17 que as declaracións de actividades e de bens patrimoniais se cubrirán nos modelos aprobados pola consellería competente en materia de incompatibilidades de altos cargos.
Finalmente, a disposición derradeira primeira dese mesmo decreto autoriza o titular da consellería competente en materia de incompatibilidades de altos cargos para que dite as normas de desenvolvemento do dito decreto, así como para a confección dos modelos de declaracións.
Ao amparo da anterior habilitación, esta orde ten por obxecto aprobar os modelos oficiais en que se deberán formular as declaracións de actividades e de bens patrimoniais por parte do persoal incluído no ámbito de aplicación da Lei 9/1996.
Tamén se publica un modelo de declaración previa á toma de posesión das reguladas no artigo 4 do Decreto 205/2008, cunha función orientativa e que comprende o contido mínimo previsto para esa declaración.
Os modelos que se aproban nesta orde estarán accesibles no enderezo web desta consellería, para facilitarlles aos destinatarios o cumprimento do trámite legalmente previsto.
Na súa virtude, facendo uso das facultades que me confire o artigo 38 da Lei 1/1983, do 22 de febreiro, de normas reguladoras da Xunta e da súa Presidencia, a disposición derradeira primeira do Decreto 205/2008, do 4 de setembro, polo que se regulan os rexistros de actividades e de bens patrimoniais de altos cargos da Xunta de Galicia, e demais disposicións de xeral aplicación,
DISPOÑO:
Primeiro.-De acordo co establecido no Decreto 205/2008, do 4 de setembro, polo que se regulan os rexistros de actividades e de bens patrimoniais de altos cargos da Xunta de Galicia, apróbanse os modelos de declaración de actividades e de bens patrimoniais de altos cargos da Xunta de Galicia, que se publican como anexos I e II, respectivamente.
Segundo.-Dáselle publicidade a un modelo de declaración previa á toma de posesión, das reguladas no artigo 4 do Decreto 205/2008, do 4 de setembro, que figura como anexo III.
Este modelo non ten carácter obrigatorio en canto á forma, ben que abrangue o contido mínimo previsto para tal declaración, nos termos establecidos no mencionado artigo 4.
Terceiro.-As persoas designadas para cargos públicos enumerados no artigo 2 da Lei 9/1996, do 18 de outubro, e mais no artigo 2 do Decreto 205/2008, do 4 de setembro, cubrirán debidamente as declaracións nos respectivos modelos, nos prazos establecidos, e remitiranas directamente en sobres pechados á Oficina de Incompatibilidades e Boas Prácticas para os efectos da súa inscrición nos correspondentes rexistros.
Os modelos que figuran nos anexos poderanse obter no enderezo web que se sinala para o efecto: http://xunta.es/.
Disposición transitoria
Única.-De acordo co disposto na disposición transitoria única do Decreto 205/2008, do 4 de setembro, as persoas que desempeñan cargos públicos en activo incluídos no seu ámbito de aplicación disporán dun prazo de tres meses contado desde a data de entrada en vigor desta orde para formular e presentar ante a Oficina de Incompatibilidades e Boas Prácticas os novos modelos de declaracións de actividades e de bens patrimoniais que se aproban.
Disposición derrogatoria
Única.-Queda derrogada a Orde do 8 de novembro de 2005 pola que se aproban os modelos de declaracións de actividades e intereses e de bens patrimoniais de altos cargos da Xunta de Galicia e cantas disposicións se opoñan ao establecido nesta orde.
Disposición derradeira
Única.-Esta orde entrará en vigor o mesmo día da súa publicación no Diario Oficial de Galicia.
Santiago de Compostela, 12 de maio de 2009.
Marta Fernández Currás
Conselleira de Facenda
Ver referencia pdf "10200D001P005.PDF"
