O artigo 74.1º do texto refundido da Lei de réxime financeiro e orzamentario de Galicia, aprobado polo Decreto lexislativo 1/1999, do 7 de outubro, atribúe a ordenación xeral de pagamentos da comunidade autónoma ao conselleiro de Economía e Facenda, competencia agora asumida pola conselleira de Facenda ao abeiro do Decreto 83/2009, do 21 de abril, polo que se fixa a estrutura orgánica dos departamentos da Xunta de Galicia. O artigo citado indica que tal competencia pode delegarse, de acordo cos procedementos legais aplicables.

A competencia de ordenación xeral de pagamentos leva consigo unha concentración de funcións na conselleira de Facenda que aconsella, dado o seu volume, recorrer á delegación de competencias, indistintamente, no director xeral de Política Financeira e no subdirector xeral do Tesouro.

Esta delegación da competencia axiliza a tramitación administrativa e repercute de xeito eficaz na última fase do procedemento de xestión orzamentaria de gastos. A delegación de xeito indistinto no director xeral e no subdirector xeral efectúa unha eficiente distribución da carga de traballo que comporta.

Na súa virtude, facendo uso das facultades que me confiren os artigos 38, 43.3º e 44 da Lei 1/1983, do 22 de febreiro, de normas reguladoras da Xunta e da súa Presidencia e 13 da Lei 30/1992, do 26 de novembro, de réxime xurídico das administracións públicas e do procedemento administrativo común e demais disposicións de xeral aplicación,

DISPOÑO:

Artigo 1º

Delégase a función de ordenación xeral de pagamentos da Comunidade Autónoma de Galicia no director xeral de Política Financeira e no subdirector xeral do Tesouro, indistintamente.

Artigo 2º

As resolucións administrativas que se adopten facendo uso da delegación contida nesta orde farán constar expresamente esta circunstancia e consideraranse ditadas polo órgano delegante.

Artigo 3º

En calquera momento, a conselleira poderá avocar para si o exercicio das competencias delegadas nesta disposición.

Disposición derradeira

Única.-Esta orde entrará en vigor o mesmo día da súa publicación no Diario Oficial de Galicia.

Santiago de Compostela, 11 de maio de 2009.

Marta Fernández Currás

Conselleira de Facenda