Mediante Resolución do 9 de febreiro de 2009 (DOG nº 38, do 24 de febreiro) convocouse o segundo proceso selectivo de programas de desenvolvemento rural e de grupos de desenvolvemento rural como entidades colaboradoras na xestión do programa Leader Galicia 2007-2013, cofinanciado con Feader.
De acordo co previsto no texto da propia convocatoria e en consonancia coa regulación que deriva do Programa de desenvolvemento rural de Galicia 2007-2013, aprobado por Decisión CE (2008) 703, do 5 de febreiro, o prazo para resolver e notificar a resolución do procedemento aos interesados é de dous meses contados desde o día seguinte a aquel en que rematou o prazo de presentación de solicitudes.
O artigo 49 da Lei 30/1992, do 26 de novembro, de réxime xurídico das administracións públicas e do procedemento administrativo común prevé a ampliación dos prazos establecidos, que non excederá da metade deles, se as circunstancias o aconsellan e con iso non se prexudican dereitos de terceiros.
A modificación da estrutura orgánica da Xunta de Galicia e a dos departamentos que a integran, así como o nomeamento dos seus titulares, afecta a composición da comisión de selección que se debe constituír para a avaliación dos proxectos, nos termos referidos na epígrafe X.II das bases reguladoras da referida convocatoria. Por outra banda, nos tres territorios que concorren a esta segunda convocatoria presentáronse dúas candidaturas, o que ralentizou o proceso de análise e avaliación dos programas de desenvolvemento rural.
Tendo en conta o anterior,
RESOLVO:
Ampliar o prazo de resolución e notificación do segundo proceso selectivo de programas de desenvolvemento rural e de grupos de desenvolvemento rural como entidades colaboradoras na xestión do programa Leader Galicia 2007-2013 ata o 16 de xuño de 2009.
Santiago de Compostela, 7 de maio de 2009.
(Por Resolución do 25 de marzo de 2009)
Fernando Veiga Fernández
Subdirector de Relacións cos Grupos
de Acción Local