A Lei 6/2007, do 11 de maio, de medidas urxentes en materia de ordenación do territorio e do litoral de Galicia, expresa no seu artigo 2 que o devandito plan sectorial de ordenación do litoral, denominado Plan de ordenación do litoral terá a natureza dun plan territorial integrado regulado na Lei 10/1995, co obxecto de establecer os criterios, principios e normas xerais para a ordenación urbanística da zona litoral baseada en criterios de perdurabilidade e sustentabilidade, así como a normativa necesaria para garantir a conservación, protección e posta en valor das zonas costeiras. Establécese, tamén, que o procedemento de aprobación do citado plan se axustará ao disposto nos artigos 5 bis (introducido pala propia Lei 6/2007) e 15 da Lei 10/1995, do 23 de novembro, de ordenación do territorio de Galicia.
Segundo o disposto no artigo 15 da Lei 10/1995, do 23 de novembro, correspóndelle ao Consello da Xunta de Galicia acordar a iniciación do procedemento de elaboración dos plans territoriais integrados. Dispón, así mesmo, que o dito acordo deberá ser publicado no Diario Oficial de Galicia.
Así, en cumprimento do disposto no citado artigo 15 da Lei 10/1995, do 23 de novembro, procédese a realizar a publicación do acordo adoptado polo Consello da Xunta de Galicia na súa reunión do día vinte e catro de maio de dous mil sete, que a seguir se transcribe:
«Primeiro.-Iniciar o procedemento de elaboración e aprobación do Plan de ordenación do litoral, de conformidade co disposto no artigo 23 da Lei 6/2007, de medidas urxentes en materia de ordenación do territorio e do litoral de Galicia, en relación co artigo 15.1º da Lei 10/1995, de ordenación do territorio de Galicia.
Segundo.-O ámbito territorial do Plan de ordenación do litoral abranguerá o territorio de todos os municipios costeiros relacionados no anexo da Lei 6/2007, de medidas urxentes en materia de ordenación do territorio e do litoral de Galicia.
Terceiro.-O obxectivo do Plan de ordenación do litoral será establecer os criterios, os principios e as normas xerais para a ordenación urbanística da zona litoral baseada en criterios de perdurabilidade e sustentabilidade, así como a normativa necesaria para garantir a conservación, protección e posta en valor das zonas costeiras, de conformidade co disposto no artigo 2 da Lei 6/2007.
Cuarto.-Encomendar á Consellería de Política Territorial, Obras Públicas e Transportes a elaboración do Plan de ordenación do litoral e o impulso e dirección do procedemento para a súa aprobación.
Os distintos organismos e entidades da Xunta de Galicia prestarán a súa colaboración e facilitarán a información necesaria para a elaboración e aprobación do Plan de ordenación do litoral».
Santiago de Compostela, 8 de maio de 2009.
Manuel Borobio Sanchiz
Director xeral de Sustentabilidade e Paisaxe