Entre as actividades propias de diversos postos de traballo encadrados no ámbito da función docente e inspectora non universitaria e da unidade técnica e determinado persoal laboral atópanse aquelas encamiñadas a garantir unha adecuada atención educativa, que exixen o desprazamento por razón do servizo deses funcionarios e persoal laboral polas estradas, utilizando necesariamente os seus vehículos particulares por mor da programación do traballo, do carácter itinerante das funcións, do horario dos centros e outras.
Atendendo a esta circunstancia e coa finalidade de compensar os eventuais danos materiais, non cubertos, que sufra o citado persoal dependente desta consellería nos seus vehículos particulares, a Consellería de Educación e Ordenación Universitaria
DISPÓN:
Primeira.-Obxecto.
1. Convócanse axudas económicas para compensar os gastos derivados dos danos causados no vehículo particular como consecuencia de accidentes de circulación producidos nos desprazamentos por razón de servizo, acontecidos desde o 1 de setembro de 2008 ata o 31 de agosto de 2009, incluído.
2. Non serán obxecto de compensación a través destas axudas:
a) Aqueles supostos en que a obriga da reparación dos danos corresponda integramente a unha entidade aseguradora ou a un terceiro.
b) Os danos derivados de avarías mecánicas.
c) Os danos derivados dos accidentes acontecidos nos desprazamentos desde o domicilio ao centro de traballo e viceversa.
Segunda.-Contía e dotación orzamentaria.
1. O importe das axudas poderá acadar como máximo a totalidade do valor da reparación sen que, en ningún caso, poida superar o límite máximo de doce mil catrocentos oitenta e cinco euros (12.485 ).
2. A contía máxima do crédito destinado a esta convocatoria será de cento seis mil cento vinte e un euros (106.121 ), con cargo á aplicación orzamentaria 09.01.421A.162.05, dos orzamentos xerais da Comunidade Autónoma de Galicia para o ano 2009.
Terceira.-Ámbito subxectivo de aplicación.
1. Poderá solicitar axuda económica o persoal docente que imparta ensinanzas reguladas na Lei orgánica 2/2006, do 2 de maio, de educación, os inspectores ao servizo da Administración educativa de Galicia, os funcionarios das unidades técnicas e o persoal non docente dependente da Consellería de Educación e Ordenación Universitaria que para o desempeño do seu posto de traballo precise o desprazamento por estrada con vehículo particular e como consecuencia diso sufra algún accidente do cal deriven danos no vehículo, non cubertos adecuadamente por outro sistema compensatorio.
2. Deben entenderse incluídos, en todo caso, os seguintes empregados públicos:
-O persoal integrante dos equipos de orientación específica e dos departamentos de orientación.
-O persoal integrante dos colexios rurais agrupados.
-O persoal integrante dos centros de formación e recursos.
-O persoal que se despraza aos centros de formación e recursos (Cefores) para a realización de cursos de formación ou aos centros en que se desenvolven os cursos convocados polos citados centros de formación e recursos.
-O persoal que preste servizos en dous ou máis centros públicos, cando se desprace dun ao outro centro dentro da mesma xornada de traballo.
-O persoal que preste servizos na atención domiciliaria.
-O persoal que preste servizos dentro da mesma localidade en dous ou máis centros, na itinerancia entre ambos os centros.
-Persoal que se despraza dentro dun mesmo centro por ter máis dunha localización física.
-Os coordinadores/as de formación nos centros de traballo no exercicio das súas funcións.
-Os coordinadores/as de formación nos centros educativos no exercicio das súas funcións.
-Os titores dos ciclos formativos.
-Os liberados sindicais no exercicio das súas funcións.
-Os delegados sindicais no exercicio das súas funcións.
-O persoal de prevención de riscos no exercicio das súas funcións.
-O persoal colaborador nos comedores escolares (funcionarios ou laborais) que se desprace para a adquisición de subministracións destinados aos citados comedores.
-Os inspectores de Educación e os inspectores ao servizo da Administración educativa.
-Os funcionarios das unidades técnicas da consellería e dos departamentos territoriais da Consellería de Educación e Ordenación Universitaria.
-Todos aqueles titulares dos postos docentes cuxo desprazamento habitual ou ocasional sexa exixido por razón de servizo como consecuencia do cumprimento dunha comisión de servizos regulamentariamente encomendada.
Cuarta.-Solicitudes e documentación.
1. O procedemento iniciarase por instancia de parte interesada, mediante solicitude segundo modelo determinado no anexo a esta orde, dirixida ao director xeral de Centros e Recursos Humanos da Consellería de Educación e Ordenación Universitaria dentro dos corenta días naturais seguintes ao da produción do accidente, e presentarase nos rexistros da consellería ou dos seus departamentos territoriais ou en calquera dos demais lugares a que se refire o artigo 38.4º da Lei 30/1992, do 26 de novembro, de réxime xurídico das administracións públicas e do procedemento administrativo común.
2. A solicitude deberá ir acompañada dos documentos que a seguir se relacionan:
a) Copia do DNI do solicitante.
b) Descrición detallada do accidente, especificando o lugar, a data e a hora deste.
c) Certificación expedida polo órgano correspondente: director do centro, xefe do servizo ou programa, ou autoridade convocante, que acredite que o desprazamento se produciu por razóns do servizo e dentro do seu ámbito territorial. Nesta certificación deberá constar o visto e prace do xefe territorial da Consellería de Educación e Ordenación Universitaria ou do secretario xeral, segundo a dependencia sexa do departamento territorial ou da secretaría xeral.
d) Orixinal ou fotocopia compulsada da factura de reparación do vehículo. A factura deberá axustarse ao disposto no artigo 15 do Decreto 206/1994, do 16 de xuño, polo que se adopta a normativa vixente en materia de prestación de servizos nos talleres de reparación de vehículos. No caso de presentar o seu orzamento, será emitido por un taller especializado, e non se tramitará a solicitude ata a achega da factura.
e) Copia do permiso de circulación (anverso e reverso).
f) Documentación acreditativa da existencia e vixencia do contrato de seguro do vehículo, en que conste o seu ámbito de cobertura e, se é o caso, o límite da franquía.
g) Taxación pericial no caso de sinistro total.
h) Dilixencias ou atestados practicados polos axentes ou autoridades encargadas da vixilancia do tráfico, se é o caso.
i) Declaración xurada de non ter sido indemnizado polos mesmos danos ou, de ser o caso, xustificación do importe das indemnizacións percibidas ou recoñecidas.
j) No suposto de baixa do vehículo deberase achegar documento xustificativo desta.
k) Certificación bancaria que acredite a titularidade da conta en que se solicita o ingreso.
Quinta.-Comisión de valoración e criterios de adxudicación.
1. As solicitudes serán examinadas por unha comisión de valoración integrada polos seguintes membros:
-O subdirector xeral de Persoal ou persoa en que delegue, que será o presidente.
-O subdirector xeral da Inspección Educativa.
-O xefe do Servizo de Prevención de Riscos Laborais.
-O xefe do Servizo de Persoal Non Docente.
-O xefe do Servizo de Réxime Xurídico e Recursos.
-O xefe do Servizo de Profesorado de Educación Secundaria, Formación Profesional e Ensinanzas Especiais.
-O xefe do Servizo de Profesorado de Educación Infantil e Primaria.
-Unha/un representante de cada unha das organizacións sindicais con presenza na mesa sectorial docente non universitaria.
-Unha/un funcionaria/o designada/o pola Dirección Xeral de Centros e Recursos Humanos, que actuará como secretaria/o, con voz e voto.
2. A Comisión de Valoración fixará os criterios para determinar o importe das axudas, tendo en conta a importancia dos danos, as circunstancias e características do accidente, con especial consideración dos eventuais supostos de culpabilidade e neglixencia do solicitante da axuda, así como as condicións, valor de mercado, modelo e antigüidade do vehículo, e realizará a correspondente proposta de resolución, coa indicación das contías que procedan, tendo en conta as limitacións establecidas na base segunda desta orde.
3. A comisión poderá solicitar o asesoramento daquelas persoas que, por razón da súa competencia ou cualificación técnica, considere oportuno, e pode ocasionalmente incorporalas a ela.
4. A Comisión de Valoración reunirase unha vez ao trimestre e efectuará proposta de aceptación ou de rexeitamento da axuda solicitada. Esta proposta seralles notificada as/aos interesadas/os que poderán formular alegacións a ela no prazo máximo de 10 días naturais.
5. A Comisión de Valoración, en función do número de solicitudes presentadas e da cuantificación delas, poderá efectuar proposta de pagamento, total ou parcial das axudas aceptadas na súa reunión trimestral.
Sexta.-Resolución.
1. As solicitudes serán resoltas logo das propostas da Comisión de Valoración, mediante orde do conselleiro de Educación e Ordenación Universitaria, que será publicada no Diario Oficial de Galicia.
2. Contra a orde de resolución das solicitudes, que pon fin á vía administrativa, caberá interpoñer potestativamente recurso de resposición ou ben directamente recurso contencioso-administrativo.
Sétima.-Pagamento das axudas.
1. As axudas aboaránselles ás beneficiarias ou beneficiarios mediante transferencia polo importe concedido á conta corrente que figure na certificación bancaria.
Oitava.-Compatibilidade con outras axudas.
As axudas concedidas en virtude desta convocatoria serán compatibles con outras outorgadas para a mesma finalidade por entidades públicas ou privadas, distintas da Administración da Xunta de Galicia, sempre que o importe conxunto das axudas non supere o custo dos gastos ocasionados.
Disposición adicional
Poderían solicitar a axuda económica convocada por esta orde aquelas persoas que resultaron excluídas na convocatoria realizada pola Orde do 28 de febreiro de 2008 (DOG do 12 de marzo) por presentar a súa solicitude con anterioridade a que se efectuase a súa publicación no Diario Oficial de Galicia.
Disposición transitoria
Para os accidentes acaecidos con anterioridade á publicación desta orde, o prazo de corenta días naturais previsto no seu punto cuarto iniciarase o día seguinte ao da súa entrada en vigor.
Disposicións derradeiras
Primeira.-Habilitación normativa.
Facúltase a secretaría xeral para ditar as instrucións necesarias para a aplicación e desenvolvemento desta orde.
Segunda.-Entrada en vigor.
Esta orde entrará en vigor o mesmo día da súa publicación no Diario Oficial de Galicia.
Santiago de Compostela, 27 de abril de 2009.
Jesús Vázquez Abad
Conselleiro de Educación e Ordenación Universitaria
Ver referencia pdf "09100D002P007.PDF"