O Decreto 79/2009, do 19 de abril, estableceu a estrutura orgánica da Xunta de Galicia e nela intégrase a Consellería do Medio Rural.

Mediante o Decreto 83/2009, do 21 de abril, fixouse a estrutura orgánica dos departamentos da Xunta de Galicia e, no seu artigo 9º, estruturouse a Consellería do Medio Rural en seis órganos superiores e tres organismos públicos.

De conformidade coa disposición transitoria primeira do Decreto 83/2009, do 21 de abril, cómpre determinar a adscrición dos órganos dependentes das direccións xerais suprimidas aos novos centros directivos mentres non se regule por decreto a nova estrutura orgánica da Consellería do Medio Rural no nivel de dirección xeral.

Pola súa banda, a disposición transitoria segunda do Decreto 83/2009, do 21 de abril, estableceu que os órganos dependentes dos centros directivos que non fosen obxecto de supresión manterán a súa estrutura e funcións ata que se proceda ao desenvolvemento da estrutura contida neste decreto, disposición esta aplicable á Secretaría Xeral, á Dirección Xeral de Desenvolvemento Rural, á Dirección Xeral de Conservación da Natureza e ao Fondo Galego de Garantía Agraria, sen prexuízo das adscricións previstas nesta orde.

En consecuencia, de acordo co previsto no artigo 30.1º.3 do Estatuto de autonomía de Galicia, e en uso das competencias que me confire a Lei 1/1983, do 22 de febreiro, reguladora da Xunta e da súa Presidencia,

DISPOÑO:

Artigo 1º

Ata que se regule por decreto a nova estrutura orgánica desta consellería as competencias correspondentes ás direccións xerais que foron suprimidas e que a seguir se relacionan, serán asumidas temporalmente polos seguintes centros directivos:

1. A Dirección Xeral de Desenvolvemento Rural da Consellería do Medio Rural asumirá as competencias correspondentes á Dirección Xeral de Estruturas e Infraestruturas Agrarias agás a Subdirección Xeral de Explotacións Agrarias.

2. A Dirección Xeral de Produción Agropecuaria da Consellería do Medio Rural asumirá as competencias correspondentes á Dirección Xeral de Produción, Industrias e Calidade Agroalimentaria, agás as correspondentes á Subdirección Xeral de Industrias e Calidade Agroalimentaria e, así mesmo, asumirá as competencias correspondentes ao Servizo de Axudas Estruturais da Subdirección Xeral de Explotacións Agrarias da Dirección Xeral de Estruturas e Infraestruturas Agrarias.

3. A Dirección Xeral de Innovación e Industrias Agrarias e Forestais da Consellería do Medio Rural asumirá as competencias correspondentes á Dirección Xeral de Investigación, Tecnoloxía e Formación Agroforestal e adscribiránselle as subdireccións xerais e todos os servizos e unidades dependentes da devandita dirección xeral suprimida, e as competencias correspondentes á Subdirección Xeral de Industrias e Calidade Agroalimentaria da Dirección Xeral de Produción, Industrias e Calidade Agroalimentaria.

4. A Dirección Xeral de Montes da Consellería do Medio Rural asumirá as competencias correspondentes á Dirección Xeral de Montes e Industrias Forestais.

5. O Fondo Galego de Garantía Agraria (Fogga) asumirá as competencias correspondentes ao Servizo de Medidas Complementarias da Subdirección Xeral de Explotacións Agrarias da Dirección Xeral de Estruturas e Infraestruturas Agrarias.

Artigo 2º

Os órganos dependentes da Secretaría Xeral, da Dirección Xeral de Desenvolvemento Rural, da Dirección Xeral de Conservación da Natureza e do Fondo Galego de Garantía Agraria manterán a súa estrutura e funcións ata que se proceda ao desenvolvemento do decreto de estrutura da consellería.

Disposición derradeira

Esta orden entrará en vigor o mesmo día da súa publicación no Diario Oficial de Galicia.

Santiago de Compostela, 30 de abril de 2009.

Samuel Jesús Juárez Casado

Conselleiro do Medio Rural