O Decreto 4/2007, do 18 de xaneiro, desenvolveu a Lei 2/2005, do 18 de febreiro, de promoción e defensa da calidade alimentaria galega, configurando un novo réxime dos consellos reguladores así como un novo réxime electoral.

A Orde do 29 de agosto de 2008, pola que se aproba o Regulamento da denominación de orixe Mexillón de Galicia e do seu Consello Regulador, contén as normas para a elección dos membros do pleno do Consello Regulador, establecendo a duración do seu mandato en catro anos. Unha vez expirado o mandato do actual Consello Regulador, pola Orde do 2 de abril de 2009 convocáronse as eleccións e ditáronse normas para a renovación do devandito Consello Regulador.

Por outra banda, a recente reestruturación administrativa levada a cabo polo Decreto 79/2009, do 19 de abril, polo que se establece a estrutura orgánica da Xunta de Galicia, vén incidir directamente no desenvolvemento do proceso electoral convocado, estando ademais, por ese motivo, aínda pendente a renovación dos órganos competentes para levar a cabo o citado proceso, polo que se considera oportuno suspender o prazo de presentación de candidaturas, mentres non conclúa o actual proceso de traspaso de poderes e reestruturación administrativa postos en marcha.

Por todo o anterior, no uso das facultades que teño conferidas,

dispoño:

Artigo único.-Suspender, ata que conclúa o actual proceso de reestruturación administrativa derivado da toma de posesión do goberno resultante das recentes eleccións autonómicas, o prazo de presentación de candidaturas establecido no artigo 6 da Orde do 2 de abril de 2009 pola que se convocan eleccións e se ditan normas para a renovación do Consello Regulador da Denominación de Orixe Mexillón de Galicia.

Disposición derradeira

Esta orde producirá efectos a partir do día seguinte ao da súa publicación no Diario Oficial de Galicia.

Santiago de Compostela, 22 de abril de 2009.

Rosa Quintana Carballo

Conselleira do Mar