No Diario Oficial de Galicia nº 37, do 23 de febreiro de 2009, publicouse a Orde do 17 de febreiro de 2009 pola que se convocan bolsas de formación de tecnólogos e persoal de apoio á investigación, bolsas de prácticas para os recentemente titulados en especialidades agrarias, forestais, veterinaria, tecnoloxía dos alimentos e bioloxía e bolsas de prácticas para alumnos e recentemente titulados de formación profesional da familia agraria.

No punto 1º do artigo 11 das bases reguladoras establécese: 1. Para a adxudicación das bolsas de tecnólogos e de persoal de apoio á investigación, a comisión de avaliación, unha vez publicada a lista definitiva de posibles bolseiros, ordenados segundo a súa puntuación, de maior a menor, convocará os candidatos para a elección de destino na Dirección Xeral de Investigación, Tecnoloxía e Formación Agroforestal, o día 17 de abril, ás 10.00 horas da mañá.

Diversas dificultades de carácter técnico, así como atrasos producidos na recepción da documentación provocaron que a fase de instrución se prolongase máis alá das datas previstas afectando, en consecuencia, á publicación das listaxes provisionais de solicitantes. Por tal motivo cómpre modificar o prazo de elección de destino marcado inicialmente para esa data.

Por todo isto, e no uso das facultades que me foron concedidas,

DISPOÑO:

Artigo único.-Modifícase o número 1º do artigo 11 das bases reguladoras da Orde do 17 de febreiro de 2009 pola que se convocan bolsas de formación de tecnólogos e persoal de apoio á investigación, bolsas de prácticas para os recentemente titulados en especialidades agrarias, forestais, veterinaria, tecnoloxía dos alimentos e bioloxía e bolsas de prácticas para alumnos e recentemente titulados de formación profesional da familia agraria, que quedará redactado como se expón:

1. Para a adxudicación das bolsas de tecnólogos e de persoal de apoio á investigación, a comisión de avaliación, unha vez publicada a lista definitiva de posibles bolseiros, ordenados segundo a súa puntuación, de maior a menor, convocará os candidatos para a elección de destino na Dirección Xeral de Investigación, Tecnoloxía e Formación Agroforestal, o día 28 de abril, ás 10.00 horas da mañá.

Disposición derradeira

Única.-Esta orde entrará en vigor o día seguinte ao da súa publicación no Diario Oficial de Galicia.

Santiago de Compostela, 26 de marzo de 2009.

Alfredo Suárez Canal

Conselleiro do Medio Rural