O Decreto 18/2006, do 26 de xaneiro, constitúe o marco normativo polo que se establecen as axudas públicas en materia de vivenda a cargo da Comunidade Autónoma de Galicia e se regula a xestión das previstas no Real decreto 801/2005, do 1 de xullo, para o período 2005-2008.
A súa disposición adicional sétima establece unha axuda de 600 euros para a mocidade adquirente ou promotora para uso propio de vivendas do Plan de Vivenda 2002-2005 para gastos de subrogación ou constitución de hipoteca e outros gastos de entrada, sempre que se dean determinados requisitos.
Así mesmo, dispón que estas axudas se atenderán da forma que será establecida mediante ordes anuais da Consellería de Vivenda e Solo que determinarán a aplicación do estado de gastos dos orzamentos xerais da Comunidade Autónoma de Galicia.
Por todo o exposto,
DISPOÑO:
Artigo único.-Para os efectos do disposto no punto segundo da disposición adicional sétima do Decreto 18/2006, do 26 de xaneiro, e para darlles cobertura aos expedientes que acaden no exercicio 2009 a fase de concesión determínase que:
1. A aplicación do estado de gastos dos orzamentos xerais da Comunidade Autónoma de Galicia para o ano 2009, onde figuran os créditos con cargo aos cales serán atendidas as axudas previstas na disposición adicional sétima do Decreto 18/2006, é a 17.02.451B.780.3.
2. O importe máximo destas axudas que se poderán outorgar dentro do exercicio orzamentario de 2009 será de 349.800 euros.
Disposición derradeira
Única.-Esta orde entrará en vigor o día seguinte ao da súa publicación no Diario Oficial de Galicia.
Santiago de Compostela, 21 de xaneiro de 2009.
Teresa Táboas Veleiro
Conselleira de Vivenda e Solo